കംബോഡിയയിലെ ഹോട്ടലില്‍ വന്‍ തീപ്പിടിത്തം; 10 മരണം, 30 പേര്‍ക്ക് പരിക്ക് (വീഡിയോ)

ബാംഗോക്ക്: തായ്‌ലന്‍ഡ് അതിര്‍ത്തിക്ക് സമീപം കംബോഡിയയിലെ ഹോട്ടലിലുണ്ടായ തീപ്പിടിത്തത്തില്‍ 10 പേര്‍ മരിച്ചു. മുപ്പതോളം പേര്‍ക്ക് സാരമായി പൊള്ളലേറ്റു. ഇവരെ ആശുപത്രിയിലേക്ക് മാറ്റി. കംബോഡിയയിലെ പോയ്‌പെറ്റിലുള്ള ഗ്രാന്‍ഡ് ഡയമണ്ട് സിറ്റി ഹോട്ടല്‍ കാസിനോയില്‍ പ്രാദേശിക സമയം ബുധനാഴ്ച രാത്രി 11:30 യോടെയാണ് വന്‍ തീപ്പിടിത്തമുണ്ടായത്. കെട്ടിടത്തില്‍ തീ ആളിപ്പടരുന്നതിന്റെ ദൃശ്യങ്ങള്‍ സമൂഹമാധ്യമങ്ങളിലൂടെ പുറത്തുവന്നിട്ടുണ്ട്. ഒന്നാം നിലയിലാണ് ആദ്യം തീ പടര്‍ന്നത്. പിന്നീട് വളരെ വേഗം മുകളിലേക്ക് തീ വ്യാപിക്കുകയായിരുന്നു.

തീ പടരുന്നതിനിടെ ആളുകള്‍ ഓടിരക്ഷപ്പെടുന്നതും ദൃശ്യങ്ങളിലുണ്ട്. തായ്‌ലന്‍ഡില്‍നിന്ന് ഫയര്‍ ട്രക്കുകളെത്തിച്ചാണ് തീ അണയ്ക്കാനുള്ള ശ്രമം തുടങ്ങിയതെന്ന് അധികൃതര്‍ അറിയിച്ചു. പരിക്കേറ്റവരെ തായ്‌ലന്‍ഡിലെ സാ കെയോ പ്രവിശ്യയിലെ ആശുപത്രികളിലേക്ക് മാറ്റിയതായി അധികൃതര്‍ അറിയിച്ചു. തായ്കംബോഡിയന്‍ അതിര്‍ത്തിയില്‍ സ്ഥിതിചെയ്യുന്ന നിരവധി കാസിനോ ഹോട്ടലുകളില്‍ ഒന്നാണ് ഗ്രാന്‍ഡ് ഡയമണ്ട് സിറ്റി. പ്രാദേശിക അധികാരികളുമായി ബന്ധപ്പെട്ട് തുടര്‍നടപടികള്‍ സ്വീകരിച്ചുവരികയാണെന്ന് തായ് വിദേശകാര്യ മന്ത്രാലയ വൃത്തങ്ങള്‍ അറിയിച്ചു.