എന്‍സിസി വിമാനം തകര്‍ന്ന് പൈലറ്റ് കൊല്ലപ്പെട്ടു
പരിശീലനത്തിന് ഉപയോഗിക്കുന്ന നമ്പര്‍ 3 എന്‍സിസി എയര്‍ യൂണിറ്റിന്റെ രണ്ട് സീറ്റുള്ള മൈക്രോലൈറ്റ് വിമാനം സംഗ്രൂര്‍-പട്യാല റോഡിലെ പട്യാല ഏവിയേഷന്‍ ക്ലബിന് സമീപമുള്ള സൈനിക പ്രദേശത്താണ് തകര്‍ന്നു വീണത്.
പട്യാല: പട്യാലയില്‍ എന്‍സിസി പരിശീലന വിമാനം തകര്‍ന്ന് വ്യോമസേന പൈലറ്റ് കൊല്ലപ്പെട്ടു. വിംഗ് കമാന്‍ഡര്‍ ഗുര്‍പ്രീത് സിംഗ് ചീമയാണ് കൊല്ലപ്പെട്ടത്. ട്രെയിനി കേഡറ്റിന് അപകടത്തില്‍ പരിക്കേറ്റു. പരിശീലനത്തിന് ഉപയോഗിക്കുന്ന നമ്പര്‍ 3 എന്‍സിസി എയര്‍ യൂണിറ്റിന്റെ രണ്ട് സീറ്റുള്ള മൈക്രോലൈറ്റ് വിമാനം സംഗ്രൂര്‍-പട്യാല റോഡിലെ പട്യാല ഏവിയേഷന്‍ ക്ലബിന് സമീപമുള്ള സൈനിക പ്രദേശത്താണ് തകര്‍ന്നു വീണത്. ക്ലബ്ബിന്റെ സിവില്‍ എയറോഡ്രോം സ്ട്രിപ്പില്‍ നിന്ന് വിമാനം പറന്നുയര്‍ന്ന് മിനിറ്റുകള്‍ക്കകമായിരുന്നു അപകടം. അപകടത്തില്‍ മരിച്ച വിംഗ് കമാന്‍ഡര്‍ എന്‍.സി.സി പരിശീലനായി ഡെപ്യൂട്ടേഷനില്‍ ജോലി ചെയ്യുകയായിരുന്നു.പട്യാലയിലെ ഗവ. മോഹിന്ദ്ര കോളേജ് വിദ്യാര്‍ത്ഥിയാണ് പരിക്കേറ്റ കേഡറ്റ് വിപന്‍ കുമാര്‍ യാദവ്. അദ്ദേഹത്തെ ചണ്ഡിമന്ദിറിലെ കമാന്‍ഡ് ആശുപത്രിയിലേക്ക് മാറ്റി.