എകെജി സെന്റര്‍ ആക്രമണം: ഇ പി ജയരാജനെ നുണപരിശോധനയ്ക്ക് വിധേയനാക്കണമെന്ന് മുസ്‌ലിം ലീഗ്
മലപ്പുറം: എകെജി സെന്റര്‍ ആക്രമണവുമായി ബന്ധപ്പെട്ട കേസില്‍ എല്‍ഡിഎഫ് കണ്‍വീനര്‍ ഇ പി ജയരാജനെ നുണപരിശോധനക്ക് വിധേയനാക്കണമെന്ന് മുസ്‌ലിം ലീഗ് സംസ്ഥാന ജനറല്‍ സെക്രട്ടറി ഇന്‍ചാര്‍ജ് പി എം എ സലാം. ജയരാജന്‍ അകത്തുപോവുമെന്ന ഘട്ടം വന്നപ്പോഴാണ് അന്വേഷണം അവസാനിപ്പിച്ചത്. എ കെ ജി സെന്റര്‍ ആക്രമിച്ച പ്രതി രണ്ടാം സുകുമാരക്കുറുപ്പാവുമെന്ന ജയരാജന്റെ പ്രസ്താവനയോട് പ്രതികരിക്കുകയായിരുന്നു അദ്ദേഹം.
കേരള പോലിസിന് കഴിയില്ലെങ്കില്‍ മറ്റ് ഏജന്‍സികളെ അന്വേഷണം ഏല്‍പ്പിക്കണം. എ കെ ജി സെന്റര്‍ ആക്രമണ കേസില്‍ ഇടത് സര്‍ക്കാര്‍ മാനക്കേടിന്റെ 24 ദിവസം പിന്നിടുകയാണ്. പ്രതിയെ തിരിച്ചറിഞ്ഞാല്‍ എല്‍ഡിഎഫിന് മറ്റൊരു കണ്‍വീനറെ തിരഞ്ഞെടുക്കേണ്ടിവരും. മാധ്യമത്തിനെതിരേ ഗള്‍ഫ് ഭരണാധികാരികള്‍ക്ക് കെ ടി ജലീല്‍ കത്തയച്ചത് മന്ത്രിസഭയുടെ തീരുമാനമായിരുന്നോ എന്ന് മുഖ്യമന്ത്രി വ്യക്തമാക്കണമെന്നും അദ്ദേഹം പറഞ്ഞു.