ന്യൂഡല്‍ഹി: ജിന്ന ആദ്യ പ്രധാനമന്ത്രി ആയിരുന്നെങ്കിൽ ഇന്ത്യ വിഭജിക്കില്ലെന്ന ബിജെപിയുടെ പരാമർഷത്തിനെതിരേ കോൺഗ്രസ്. നെഹ്രുവിനേക്കാള്‍ ബിജെപി നേതാക്കള്‍ക്ക് പ്രിയം ജിന്നയെ ആണെന്ന് കുറ്റപ്പെടുത്തി കോണ്‍ഗ്രസ് വക്താവ് പവന്‍ ഖേരയാണ് ബിജെപിയുടെ പേര് ഭാരതീയ ജിന്നാ പാർട്ടിയെന്ന് തിരുത്തിയത്. ജിന്ന ആദ്യ പ്രധാനമന്ത്രി ആയിരുന്നുവെങ്കില്‍ ഇന്ത്യ വിഭജിക്കില്ലായിരുന്നുവെന്ന മധ്യപ്രദേശിലെ രത്‌ലം മണ്ഡലത്തിലെ ബിജെപി സ്ഥാനാര്‍ഥി ഗുമന്‍ സിംഗ് ദാമോദാറിന്‍റെ പ്രസ്താവന വിവാദമായതിന് മറുപടി നല്‍കുകയായിരുന്നു കോണ്‍ഗ്രസ് വക്താവ്. വിഭജനത്തിന്റെ ഏക ഉത്തരവാദി കോണ്‍ഗ്രസാണെന്നും ദാമോര്‍ കുറ്റപ്പെടുത്തിയിരുന്നു. പാകിസ്ഥാന്‍ വിരുദ്ധതയും ദേശീയ സുരക്ഷയും പ്രചാരണ ആയുധമാക്കിയാണ് ബിജെപി വോട്ട് തേടുന്നത്.