ശബരിമലയിലെ സ്ത്രീ പ്രവേശനത്തിനെതിരേ സ്ത്രീകള്‍ തന്നെ രംഗത്തുവന്നത് സ്ത്രീ മുന്നേറ്റത്തിലെ വൈരുധ്യമായെന്ന് ഹൈക്കോടതി
കൊച്ചി: ശബരിമലയില്‍ സ്ത്രീപ്രവേശനം അനുവദിച്ച സുപ്രിംകോടതി വിധി സ്ത്രീമുന്നേറ്റത്തിന് പുതിയൊരുമാനം നല്‍കിയെന്നും ഉത്തരവിനെ സ്ത്രീകള്‍ എതിര്‍ത്തത് വൈരുധ്യമായെന്നും ഹൈക്കോടതി. പൊതുവിടങ്ങളില്‍ സ്ത്രീ മുന്നേറ്റത്തില്‍ കാര്യമായ പുരോഗതിയുണ്ടായെങ്കിലും സ്വകാര്യ ഇടങ്ങളില്‍ മാറ്റമുണ്ടായില്ലെന്നും ജസ്റ്റിസുമാരായ ഡോ. എ കെ ജയശങ്കരന്‍ നമ്പ്യാരും സി എസ് സുധയുമടങ്ങിയ ഡിവിഷന്‍ ബെഞ്ച് നിരീക്ഷിച്ചു. മലയാള സിനിമയിലെ ലിംഗ വിവേചനവുമായി ബന്ധപ്പെട്ട ഹേമ കമ്മിറ്റി റിപോര്‍ട്ടിലെ ഹരജി പരിഗണിക്കുമ്പോഴായിരുന്നു പരാമര്‍ശം.
പൊതുവിടങ്ങളിലെ മുന്നേറ്റത്തിന് ചരിത്രപരമായ കാരണങ്ങളുണ്ട്. മത-ജാതീയ അടിച്ചമര്‍ത്തലുകള്‍ക്കെതിരായ പോരാട്ടങ്ങള്‍ക്കൊപ്പം സ്ത്രീകള്‍ക്കുനേരെയുള്ള അടിച്ചമര്‍ത്തലുകള്‍ക്കെതിരേയും മുന്നേറ്റങ്ങളുണ്ടായി. ഈ പോരാട്ടങ്ങളുടെ മുന്‍നിരയില്‍ സ്ത്രീകളുമുണ്ടായിരുന്നു. എന്നാല്‍, വീടുകളിലേക്കും മതങ്ങളിലേക്കും എത്തുമ്പോള്‍ അവിടെ കാര്യമായ മുന്നേറ്റമുണ്ടായെന്നു പറയാനാകില്ല. സ്ത്രീശക്തിയെ അവര്‍ തിരിച്ചറിയണമെന്നും കോടതി പറഞ്ഞു.
