പത്മജയുടെ ബിജെപി പ്രവേശനം: വടകരയിലെ സ്ഥാനാര്‍ത്ഥിത്വത്തില്‍ നിന്ന് കെ മുരളീധരന്‍ പിന്‍മാറിയേക്കും
കോഴിക്കോട്: സഹോദരി പത്മജ വേണുഗോപാല്‍ ബിജെപിയില്‍ ചേരുന്ന സാഹചര്യത്തില്‍ വടകരയിലെ സ്ഥാനാര്‍ത്ഥിത്വത്തില്‍ നിന്ന് പിന്മാറാന്‍ കെ മുരളീധരന്‍ ആലോചിക്കുന്നു. ഇതിന്റെ ഭാഗമായി അടുപ്പമുള്ള നേതാക്കളുമായി ഇദ്ദേഹം ചര്‍ച്ച നടത്തി. ഇന്ന് ബിജെപി ദേശീയ ആസ്ഥാനത്തെത്തിയാണ് പത്മജ വേണുഗോപാല്‍ അംഗത്വം സ്വീകരിക്കുമെന്ന് അറിയിച്ചിരിക്കുന്നത്. ഈ നീക്കം കോണ്‍ഗ്രസിന് കനത്ത തിരിച്ചടിയായിരിക്കെയാണ് സഹോദരനും വടകരയിലെ സിറ്റിങ് എംപിയുമായ കെ മുരളീധരന്‍ മത്സര രംഗത്ത് നിന്ന് പിന്മാറുന്നത്. സിപിഎം കേന്ദ്രകമ്മിറ്റിയംഗം കെകെ ശൈലജയുടെ സ്ഥാനാര്‍ത്ഥിത്വത്തോടെ ഇക്കുറി വടകരയില്‍ കടുത്ത മത്സരത്തിന് കളമൊരുങ്ങിയിരുന്നു. ഈ സാഹചര്യത്തില്‍ സഹോദരിയുടെ കൂറുമാറ്റം രാഷ്ട്രീയമായി മണ്ഡലത്തില്‍ തിരിച്ചടിയാകാനുള്ള സാധ്യതയുമുണ്ട്.