പാലക്കാട്: നാല് വര്‍ഷമായി പാലക്കാട് ധോണി പ്രദേശത്തിന്റെ ഉറക്കം കെടുത്തിയ കാട്ടുകൊമ്പന്‍ പാലക്കാട് ടസ്‌കര്‍ സെവന് (പിടി 7) വനം മന്ത്രി എ കെ ശശീന്ദ്രന്‍ പുതിയ പേരിട്ടു. 'ധോണി' എന്ന് നാടിന്റെ പേരിലാണ് പിടി സെവന് ഇനി അറിയപ്പെടുക. ആനയെ പിടികൂടി കൂട്ടിലടച്ചതിനു പിന്നാലെയാണ് പേരുമാറ്റം. ധോണി ഫോറസ്റ്റ് സ്‌റ്റേഷനിലെ പ്രത്യേക കൂട്ടിലേക്കാണ് ആനയെ മാറ്റിയത്.
പിടി സെവനിന് ഇനി കുങ്കിയാനയാവാനുള്ള പരിശീലനം നല്‍കുമെന്നും അധികൃതര്‍ അറിയിച്ചു. പ്രദേശത്തെ വിറപ്പിച്ച കാട്ടുകൊമ്പനെ ശ്രമകരമായ ദൗത്യത്തിലൂടെയാണ് ഇന്ന് പിടികൂടിയത്. 72 അംഗ ദൗത്യസംഘം രാവിലെ ഏഴ് മൂന്നിന് മയക്കുവെടിവച്ച ഒറ്റയാനെ മൂന്ന് കുങ്കിയാനകളുടെ സഹായത്തോടെ നാല് മണിക്കൂര്‍ കൊണ്ടാണ് വനത്തില്‍ നിന്ന് ധോണി ക്യാംപിലെത്തിച്ചത്. ചീഫ് വെറ്ററിനറി സര്‍ജന്‍ ഡോ. അരുണ്‍ സക്കറിയയുടെ നേതൃത്വത്തില്‍ വെറും അമ്പത് മീറ്റര്‍ അകലെനിന്ന് ആനയുടെ ചെവിക്ക് പിന്നിലേക്ക് മയക്കുവെടി ഉതിര്‍ക്കുകയായിരുന്നു.
ധോണി, മായാപുരം, മുണ്ടൂര്‍ മേഖലകളില്‍ നാശമുണ്ടാക്കിയ കൊമ്പനാണ് ഒടുവില്‍ പിടിയിലായത്. 2022 ജൂലൈ 8 എട്ടിന് പ്രഭാത സവാരിക്കാരനെ ആന ചവിട്ടിക്കൊന്നിരുന്നു. മായാപുരം സ്വദേശി ശിവരാമനാണ് കൊല്ലപ്പെട്ടത്. പി ടി സെവനെ പിടികൂടാനുള്ള ദൗത്യസംഘത്തില്‍പ്പെട്ടവരെ മന്ത്രി എം ബി രാജേഷിന്റെ നേതൃത്വത്തില്‍ പൊന്നാടയണിയിച്ച് ആദരിച്ചു. ധോണി ക്യാംപില്‍ വച്ചായിരുന്നു ചടങ്ങ്.