കൊവിഡ്- 19: കോണ്‍ഗ്രസ് ദേശീയതലത്തില്‍ കണ്‍ട്രോള്‍ റൂം തുറന്നു
സംഘടനാകാര്യ ചുമതലയുള്ള എഐസിസി ജനറല്‍ സെക്രട്ടറി കെ സി വേണുഗോപാലിന്റെ നേതൃത്വത്തില്‍ നാലംഗസംഘമാണ് പ്രവര്‍ത്തനങ്ങള്‍ നിയന്ത്രിക്കുക.
ന്യൂഡല്‍ഹി: കൊവിഡ്- 19 വൈറസ് അനുബന്ധമായ കാര്യങ്ങളുടെ ഏകോപനത്തിനായി എഐസിസി ആസ്ഥാനത്ത് സെന്‍ട്രല്‍ കണ്‍ട്രോള്‍ റൂം തുറന്നു. സംഘടനാകാര്യ ചുമതലയുള്ള എഐസിസി ജനറല്‍ സെക്രട്ടറി കെ സി വേണുഗോപാലിന്റെ നേതൃത്വത്തില്‍ നാലംഗസംഘമാണ് പ്രവര്‍ത്തനങ്ങള്‍ നിയന്ത്രിക്കുക.
വൈറസ് പടരുന്നത് തടയാനായി പാര്‍ട്ടിയും പാര്‍ട്ടി ഭരിക്കുന്ന സംസ്ഥാനങ്ങളിലെ സര്‍ക്കാരുകളും ചെയ്യുന്ന പ്രവര്‍ത്തനങ്ങളും ദുരിതാശ്വാസപ്രവര്‍ത്തനങ്ങളും ഏകോപിപ്പിക്കുന്നതിന് വേണ്ടിയാണ് കണ്‍ട്രോള്‍ റൂം തുറന്നിരിക്കുന്നതെന്ന് എഐസിസി വാര്‍ത്താക്കുറിപ്പില്‍ അറിയിച്ചു. രാജീവ് സതവ് എംപി, ഡല്‍ഹി മുന്‍ എംഎല്‍എ ദേവേന്ദ്ര യാദവ്, എഐസിസി സെക്രട്ടറി മനീഷ് ചാത്രത്ത് എന്നിവര്‍ അടങ്ങിയതാണ് സെന്‍ട്രല്‍ കണ്‍ട്രോള്‍ റൂം.