ന്യൂഡല്‍ഹി: മുന്‍ ക്രിക്കറ്റ് താരവും ബിജെപി പുറത്താക്കിയ നേതാവുമായ കീര്‍ത്തി ആസാദ് കോണ്‍ഗ്രസില്‍ ചേര്‍ന്നു. രാഹുല്‍ ഗാന്ധിയില്‍ നിന്നും അംഗത്വം സ്വീകരിച്ചതായും കോണ്‍ഗ്രസിന്റെ ഭാഗമാവാന്‍ തീരുമാനിച്ചതായും ആസാദ് ട്വീറ്റ് ചെയ്തു. ഡല്‍ഹി ഡിസ്ട്രിക് ക്രിക്കറ്റ് അസോസിയേഷനില്‍ നടന്ന ക്രമക്കേടുകളെ തുടര്‍ന്നു കേന്ദ്രമന്ത്രി അരുണ്‍ ജയ്റ്റിലിക്കെതിരേ വിമര്‍ശനമുന്നയിച്ചതിനാണു, ബിഹാറിലെ ദര്‍ബന്‍ഗയില്‍ നിന്നുള്ള എംപിയായ ആസാദിനെ ബിജെപി പുറത്താക്കിയത്. 1983 ലെ ലോകകപ്പ് നേടിയ ഇന്ത്യന്‍ ക്രിക്കറ്റ് ടീമിലെ അംഗമായിരുന്ന ആസാദ്, ബീഹാര്‍ മുന്‍ മുഖ്യമന്ത്രിയും കോണ്‍ഗ്രസ് നേതാവുമായിരുന്ന ജാ ആസാദിന്റെ മകനാണ്.