ഡല്‍ഹിയില്‍ ബിജെപിയുടെ വിജയത്തിന് കാരണക്കാര്‍ കോണ്‍ഗ്രസ്: എം വി ഗോവിന്ദന്
തൃശ്ശൂര്‍: കോണ്‍ഗ്രസിന് വല്ല്യേട്ടന്‍ മനോഭാവമാണെന്നും ഡല്‍ഹി തിരഞ്ഞെടുപ്പില്‍ ബി.ജെ.പിക്കുണ്ടായ വിജയത്തിന് കാരണക്കാര്‍ കോണ്‍ഗ്രസാണെന്നും സി പി എം സംസ്ഥാന സെക്രട്ടറി എം വി ഗോവിന്ദന്. തൃശ്ശൂര്‍ ജില്ലാ സമ്മേളനത്തില്‍ സംസാരിക്കവെയാണ അദ്ദേഹം കോണ്‍ഗ്രസിനെതിരേ ആഞ്ഞടിച്ചത്. ബി ജെ പി. വിരുദ്ധ രാഷ്ട്രീയം കാര്യക്ഷമമായി കൈകാര്യം ചെയ്യാന്‍ കോണ്‍ഗ്രസ് തയ്യാറാവുന്നില്ലെന്നും എം വി ഗോവിന്ദന് കുറ്റപ്പെടുത്തി.
ഡല്‍ഹി പോലെ തന്ത്രപ്രധാനമായ ഒരു പ്രദേശത്തിന്റെ ഭരണം 25 വര്‍ഷങ്ങള്‍ക്ക് ശേഷം വീണ്ടും ബി.ജെ.പിക്ക് ലഭിച്ചിരിക്കുകയാണ്. ആരാണ് ആ ഭരണം ബി.ജെ.പിക്ക് നല്‍കിയത് എന്ന ചോദ്യത്തിന് ഒരൊറ്റ ഉത്തരമേയുള്ളൂ, അത് കോണ്‍ഗ്രസാണ്. ഇന്ത്യ മുന്നണിയുടെ ഭാഗമായി കോണ്‍ഗ്രസിനും എ.എ.പിക്കും യോജിച്ച് നില്‍ക്കാനാവാത്ത സാഹചര്യം സൃഷ്ടിച്ചത് കോണ്‍ഗ്രസാണെന്നാണ് എം.വി. ഗോവിന്ദന് കുറ്റപ്പെടുത്തിയത്.
ഞങ്ങള്‍ മഹാമേരുവാണെന്നാണ് ഇപ്പോഴും കോണ്‍ഗ്രസ് പറഞ്ഞുകൊണ്ടിരിക്കുന്നത്. കഴിഞ്ഞ തിരഞ്ഞെടുപ്പിലും അതിനു മുന്‍പ് നടന്ന തിരഞ്ഞെടുപ്പിലും ഈ തിരഞ്ഞെടുപ്പിലും കോണ്‍ഗ്രസിന്റെ സീറ്റ് വട്ടപൂജ്യമാണ്. യോജിച്ച് മത്സരിച്ചില്ലെങ്കില്‍ അവിടെ ബി ജെ പിക്കായിരിക്കും മുന്‍കൈ കിട്ടുകയെന്ന് ഇന്ത്യന്‍ രാഷ്ട്രിയത്തിന്റെ എന്തെങ്കിലും ഭാഗമറിയുന്ന എല്ലാവര്‍ക്കും അത് മനസിലാകുമെന്നും അദ്ദേഹം പറഞ്ഞു.
