ടാങ്കര്‍ ലോറിയില്‍ കടത്തിക്കൊണ്ടുവന്ന 250 കിലോ കഞ്ചാവ് പിടിച്ച സംഭവം: പ്രധാന പ്രതി പോലിസ് പിടിയില്‍
ചെങ്ങമനാട് കുന്നുകര സ്വദേശി നൗഷര്‍ (നൗഷാദ്- 41) നെയാണ് കുറുപ്പംപടി പോലിസ് അറസ്റ്റ് ചെയ്തത്.ലോറി ഓടിച്ചിരുന്ന സെല്‍വകുമാറിനെ പോലിസ് അന്ന് തന്നെ അറസ്റ്റു ചെയ്തിരുന്നു
കൊച്ചി: ടാങ്കര്‍ ലോറിയില്‍ കടത്തിക്കൊണ്ടുവന്ന 250 കിലോയോളം കഞ്ചാവ് കടത്തിയ കേസിലെ പ്രധാന പ്രതി പിടിയില്‍.ചെങ്ങമനാട് കുന്നുകര സ്വദേശി നൗഷര്‍ (നൗഷാദ്- 41) നെയാണ് കുറുപ്പംപടി പോലിസ് അറസ്റ്റ് ചെയ്തത്.വിഷു ദിനത്തില്‍ പെരുമ്പാവൂര്‍ ഇരവിച്ചിറയില്‍ വച്ചാണ് ടാങ്കര്‍ ലോറിയില്‍ ഒളിപ്പിച്ചു കടത്തുകയായിരുന്ന 250 കിലോയോളം കഞ്ചാവ് പിടിച്ചത്.
സംഭവത്തില്‍ ലോറി ഓടിച്ചിരുന്ന സെല്‍വകുമാറിനെ പോലിസ് അന്ന് തന്നെ അറസ്റ്റു ചെയ്തിരുന്നു. തുടര്‍ന്ന് ജില്ലാ പോലീസ് മേധാവി കെ കാര്‍ത്തിക്കിന്റെ നേതൃത്വത്തിലുള്ള പ്രത്യേക ടീം കഞ്ചാവ് കടത്തിനെക്കുറിച്ച് നടത്തിയ അന്വേഷണത്തിലാണ് നൗഷര്‍ അറസ്റ്റിലാകുന്നത്. നൗഷറിനു വേണ്ടിയാണ് കഞ്ചാവ് കൊണ്ടുവന്നതെന്നും ഇതിനു വേണ്ട പണം മുടക്കിയതും ഇയാളാണെന്നും പോലിസ് പറഞ്ഞു. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു. കൂടുതല്‍ പ്രതികള്‍ക്കായി അന്വേഷണം വ്യാപിപ്പിച്ചുതായി പോലിസ് പറഞ്ഞു.