വിദ്യാര്‍ഥികള്‍ക്ക് സ്റ്റുഡന്റസ് പാസുമായി കൊച്ചി മെട്രോ
ടിക്കറ്റ് നിരക്കില്‍ 60 മുതല്‍ 83 ശതമാനം വരെ ഡിസ്‌കൗണ്ട് അനുവദിക്കുന്ന മൂന്നുപാക്കേജുകളാണ് വിദ്യാര്‍ഥികള്‍ക്കായി അവതരിപ്പിച്ചിരിക്കുന്നത്
കൊച്ചി: പരീക്ഷക്കാലത്ത് സൗജന്യ നിരക്കില്‍ വിദ്യാര്‍ഥികള്‍ക്ക് യഥേഷ്ടം യാത്ര ചെയ്യുന്നതിനായി സ്റ്റുഡന്റ്‌സ് പാസുമായി കൊച്ചി മെട്രോ.വിദ്യാഭ്യാസ സ്ഥാപനങ്ങള്‍ പൂര്‍ണ്ണ തോതില്‍ തുറന്നതോടെ സ്റ്റഡന്റ്‌സ് പാസിന് പ്രിയമേറുകയാണെന്ന് കെഎംആര്‍എല്‍ അധികൃതര്‍ വ്യക്തമാക്കി.ഏതുസ്‌റ്റേഷനില്‍ നിന്ന് ഏതുസ്‌റ്റേഷനിലേക്കും യഥേഷ്ടം സഞ്ചരിക്കാവുന്നതുമുതല്‍ മുന്‍കൂട്ടി നിശ്ചയിച്ച സ്‌റ്റേഷനുകളിലേക്ക് മാത്രമായി യാത്ര നിശ്ചയിക്കാവുന്നതുവരെയുള്ള പാസുകള്‍ ലഭ്യമാണ്.
ടിക്കറ്റ് നിരക്കില്‍ 60 മുതല്‍ 83 ശതമാനം വരെ ഡിസ്‌കൗണ്ട് അനുവദിക്കുന്ന മൂന്നുപാക്കേജുകളാണ് വിദ്യാര്‍ഥികള്‍ക്കായി അവതരിപ്പിച്ചിരിക്കുന്നത്. കൊച്ചി വണ്‍കാര്‍ഡിലെ സ്റ്റുഡന്റ് പ്രതിമാസ പാസില്‍ ടിക്കറ്റ് നിരക്കിന്റെ 60 ശതമാനം വരെ ഡിസ്‌കൗണ്ട് ലഭിക്കും. 30 ദിവസമാണ് കാലാവധി. ഇക്കാലയളവില്‍ നിശ്ചിത സ്‌റ്റേഷനില്‍ നിന്ന് നിശ്ചിത സ്‌റ്റേഷനിലേക്ക് 100 യാത്രകള്‍ വരെ നടത്താം.
80 രൂപയുടെ പ്രതിദിന പാസ് എടുത്താല്‍ ഏതു സ്‌റ്റേഷനില്‍ നിന്നും ഏതുസ്‌റ്റേഷനിലേക്കും എത്ര യാത്രകള്‍ വേണമെങ്കിലും നടത്താം. 1200 രൂപയുടെ പ്രതിമാസ പാസ് എടുത്താല്‍ ടിക്കറ്റ് നിരക്കിന്റെ 83 ശതമാനം വരെ ഡിസ്‌കൗണ്ട് ലഭിക്കും. ഒരുമാസത്തേക്ക് ഏതുസ്‌റ്റേഷനില്‍ നിന്ന് ഏതുസ്‌റ്റേഷനിലേക്കും 120 യാത്ര ഒരു മാസം നടത്താം. എല്ലാ മെട്രോ സ്‌റ്റേഷനുകളിലും സ്റ്റുഡന്റ് പാസ് ലഭ്യമാണെന്നും കെഎംആര്‍എല്‍ അധികൃതര്‍ വ്യക്തമാക്കി.