മാഞ്ചസ്റ്റര്‍ ഡെര്‍ബി സിറ്റിക്ക്; ഓള്‍ഡ്ട്രാഫോഡില്‍ ചെകുത്താന്‍മാര്‍ക്ക് നാണക്കേട്
രണ്ടാം പകുതിയില്‍ ജേഡന്‍ സാഞ്ചോ, റാഷ്‌ഫോഡ് എന്നിവരെ യുനൈറ്റഡ് ഇറക്കിയെങ്കിലും രക്ഷയില്ലായിരുന്നു
മാഞ്ചസ്റ്റര്‍: ഹോം ഗ്രൗണ്ടില്‍ രക്ഷയില്ലാതെ മാഞ്ചസ്റ്റര്‍ യുനൈറ്റഡ്. ഇന്ന് നടന്ന മാഞ്ചസ്റ്റര്‍ ഡെര്‍ബിയില്‍ സിറ്റിയോട് എതിരില്ലാത്ത രണ്ട് ഗോളിനാണ് യുനൈറ്റഡ് പരാജയപ്പെട്ടത്. ഹോം ഗ്രൗണ്ടില്‍ യുനൈറ്റഡ് നിര വീണ്ടും കളിമറന്നാണ് കളിച്ചത്. സിറ്റിയുടെ ശക്തമായ നിര നിരവധി അവസരങ്ങളാണ് സൃഷ്ടിച്ചത്. എന്നാല്‍ യുനൈറ്റഡിന്റെ ഗോളി ഡി ഹിയയുടെ തകര്‍പ്പന്‍ സേവുകളാണ് അവരെ വമ്പന്‍ തോല്‍വിയില്‍ നിന്നും രക്ഷിച്ചത്. യുനൈറ്റഡ് ഡിഫന്റര്‍ എറിക് ബയിയുടെ സെല്‍ഫ് ഗോളാണ് സിറ്റിക്ക് ഏഴാം മിനിറ്റില്‍ ലീഡ് നല്‍കിയത്. തുടര്‍ന്ന് യുനൈറ്റഡ് റൊണാള്‍ഡോയിലൂടെ ചെറിയ നീക്കങ്ങള്‍ നടത്തിയെങ്കിലും ഒന്നും ലക്ഷ്യം കണ്ടില്ല. 45ാം മിനിറ്റില്‍ ബെര്‍ണാഡോ സില്‍വയാണ് സിറ്റിയുടെ ലീഡെടുത്തത്. രണ്ടാം പകുതിയില്‍ ജേഡന്‍ സാഞ്ചോ, റാഷ്‌ഫോഡ് എന്നിവരെ യുനൈറ്റഡ് ഇറക്കിയെങ്കിലും രക്ഷയില്ലായിരുന്നു. ജയത്തോടെ സിറ്റി പ്രീമിയര്‍ ലീഗില്‍ രണ്ടാം സ്ഥാനത്തേക്ക് കുതിച്ചു. യുനൈറ്റഡാവട്ടെ ആറാം സ്ഥാനത്തേക്കും വീണു.