ബെലൊ ഹൊറിസോണ്ടോ: കോപ അമേരിക്കയില്‍ രണ്ടാം ജയം തേടിയിറങ്ങിയ ബ്രസീലിന് സമനില. വെനിസ്വേലയാണ് ബ്രസീലിനെ ഗോള്‍രഹിത സമനിലയില്‍ തളച്ചത്. കളിയില്‍ മുഴുവന്‍ സമയവും ആധിപത്യം തുടരാന്‍ ബ്രസീലിനായെങ്കിലും വെനിസ്വേലയുടെ പ്രതിരോധത്തിന് മുന്നില്‍ തന്ത്രങ്ങള്‍ വിലപോയില്ല. ഇരുപകുതികളിലുമായി ബ്രസീൽ അടിച്ച രണ്ടു ഗോളുകളും വിഎആർ പരിശോധനയിൽ ഗോളല്ലെന്ന് സ്ഥിരീകരിച്ചതോടെയാണ് വെനസ്വേലയ്ക്ക് ആശ്വാസമായത്. ആദ്യ പകുതിയിൽ ഗബ്രിയേൽ ജീസസ് അടിച്ചതായിരുന്നു ആദ്യ ഗോൾ. പക്ഷേ റഫറി ഇത് അനുവദിച്ചില്ല. തുടർന്ന് 87ാം മിനിറ്റിൽ കുട്ടീഞ്ഞോയും ബ്രസീലിനായി ലക്ഷ്യം കണ്ടു. എങ്കിലും ഭാഗ്യം വെനിസ്വലയ്ക്കൊപ്പമായിരുന്നു. ഗോൾ അനുവദിക്കാതെ സമനിലയിൽ തുടരുകയായിരുന്നു. ആദ്യ കളിയില്‍ ബൊളീവിയയെ 3 ഗോളിന് തോല്‍പ്പിച്ചാണ് ബ്രസീല്‍ ഇന്നിറങ്ങിയത്.