ന്യൂഡല്‍ഹി: ഡല്‍ഹിയിലെ സര്‍ ഗംഗാ റാം ആശുപത്രിയിലെ 37 ഡോക്ടര്‍മാര്‍ക്ക് കൊവിഡ് സ്ഥിരീകരിച്ചു. കഴിഞ്ഞ ഏതാനും ആഴ്ചകളായി കൊറോണ വൈറസ് കേസുകളില്‍ വന്‍ വര്‍ധനവാണ് ഡല്‍ഹിയില്‍ രേഖപ്പെടുത്തിയിട്ടുള്ളത്. പ്രതിദിന കേസുകളുടെ എണ്ണം ഈ വര്‍ഷം ആദ്യമായി 7,000 കടന്നു. കഴിഞ്ഞ ദിവസങ്ങളില്‍ ആശുപത്രികളില്‍ മുമ്പത്തേതിനേക്കാള്‍ കൂടുതല്‍ രോഗികളെത്തുന്നതിനാല്‍ ആരോഗ്യ പ്രവര്‍ത്തകരില്‍ നിരവധി പേര്‍ക്കാണ് രോഗം ബാധിക്കുന്നത്. സര്‍ ഗംഗാ റാം ആശുപത്രിയില്‍ രോഗം ബാധിച്ചവരില്‍ പലരും ചെറുപ്പക്കാരാണ്. ഇവരില്‍ ഭൂരിഭാഗവും വാക്‌സിന്‍ എടുത്തിരുന്നു. സമ്പര്‍ക്ക വിവരങ്ങള്‍ ശേഖരിച്ചു വരികയാണ്. ഇവരില്‍ ഭൂരിഭാഗത്തിനും നേരിയ ലക്ഷണങ്ങളുണ്ടെന്ന് ആശുപത്രി അധികൃതര്‍ പറഞ്ഞു.
'സര്‍ ഗംഗാ റാം ആശുപത്രിയില്‍ കൊവിഡ് രോഗികളെ സേവിക്കുന്ന 37 ഡോക്ടര്‍മാര്‍ക്കാണ് കൊവിഡ് 19 സ്ഥിരീകരിച്ചത്. ഭൂരിഭാഗത്തിനും നേരിയ ലക്ഷണങ്ങളുണ്ട്. 32 ഡോക്ടര്‍മാര്‍ വീട്ടില്‍ ക്വാറന്റെനിലാണ്. അഞ്ചുപേരെ ആശുപത്രിയില്‍ പ്രവേശിപ്പിച്ചതായും ആശുപത്രി വൃത്തങ്ങള്‍ അറിയിച്ചു. ഒരു വര്‍ഷത്തോളമായി മഹാമാരിക്കെതിരായ പോരാട്ടത്തില്‍ മുന്നില്‍ നില്‍ക്കുന്ന ആശുപത്രികളില്‍ ഒന്നാണ് സര്‍ ഗംഗാ റാം ആശുപത്രി. ഡല്‍ഹിയില്‍ വ്യാഴാഴ്ച 7,437 പുതിയ കൊവിഡ് 19 കേസുകള്‍ റിപ്പോര്‍ട്ട് ചെയ്തു. 24 പേര്‍ കൂടി മരണപ്പെട്ടു. ഇതോടെ മരണസംഖ്യ 11,157 ആയി.
37 Doctors At Delhi's Sir Ganga Ram Hospital Test Positive COVID-19