പോക്സോ കേസില്‍ അറസ്റ്റിലായ അധ്യാപകനെ രക്ഷിക്കാന്‍ രാഷ്ട്രീയ ഇടപെടലെന്ന് ആക്ഷേപം
കോട്ടയം: പ്രായപൂര്‍ത്തിയാവാത്ത വിദ്യാര്‍ഥിയ പീഡിപ്പിച്ചെന്ന പരാതിയില്‍ പോക്സോ കേസില്‍ അറസ്റ്റ് ചെയ്ത അധ്യാപകനെ രക്ഷിക്കാന്‍ രാഷ്ട്രീയ ഇടപെടലെന്ന് ആക്ഷേപം. കോട്ടയം നഗരത്തിലെ സര്‍ക്കാര്‍ ഹൈസ്‌കൂളിലെ ഹിന്ദി അധ്യാപകനായ മനോജിനെയാണ് വെസ്റ്റ് പോലിസ് അറസ്റ്റ് ചെയ്തത്. പ്രതിയെ കോടതിയില്‍ ഹാജരാക്കി റിമാന്‍ഡ് ചെയ്തു. എന്നാല്‍, കേസില്‍നിന്ന് അധ്യാപകനെ രക്ഷിക്കാനും ഇരയുടെ വീടുകളിലെത്തി സമ്മര്‍ദ്ദം ചെലുത്താന്‍ ശ്രമിച്ചതായും ആക്ഷേപമുണ്ട്. നേരത്തേയും അധ്യാപകനെതിരേ സമാനരീതിയിലുള്ള ആക്ഷേപങ്ങള്‍ ഉയര്‍ന്നിരുന്നെങ്കിലും നിയമനടപടികളൊന്നുമുണ്ടായിരുന്നില്ല. വിദ്യാര്‍ഥികള്‍ പരാതി ഉന്നയിച്ചപ്പോള്‍ മോശക്കാരാക്കി ചിത്രീകരിക്കുകയാണ് പതിവെന്നാണ് ആരോപണം. പ്രതിയെ രക്ഷിക്കാന്‍ പ്രദേശത്തെ കോണ്‍ഗ്രസ് നേതാവും മറ്റുമാണ് സമ്മര്‍ദ്ദം ചെലുത്തുന്നതെന്നും ആരോപണമുണ്ട്.