രാജ്യത്ത് കൊവിഡ് ബാധിതരുടെ എണ്ണം ഒന്നരലക്ഷം കടന്നു; മരണം 4337
മഹാരാഷ്ട്രയിലാണ് ഏറ്റവും കൂടുതല്‍ കൊവിഡ് ബാധിതര്‍ ഉള്ളത്. മഹാരാഷ്ട്രയില്‍ ആയിരത്തി എഴുന്നൂറിലധികം പേരാണ് രോഗം ബാധിച്ച് മരിച്ചത്.
ന്യൂഡല്‍ഹി: രാജ്യത്ത് കൊവിഡ് ബാധിതരുടെ എണ്ണം 1,58,333 ആയി. ഇതുവരെ 4337 പേരാണ് രാജ്യത്ത് കൊവിഡ് ബാധിച്ച് മരിച്ചത്. ഇന്നലെ മാത്രം 6566 പേര്‍ക്കാണ് രോഗം സ്ഥിരീകരിച്ചത്. 24 മണിക്കൂറിനിടെ 194 പേര്‍ വൈറസ് ബാധിച്ച് മരിച്ചു. 67691 പേര്‍ക്ക് രോഗം ഭേദമായി.
നിലവില്‍ 86110 പേരാണ് വിവിധ സംസ്ഥാനങ്ങളിലായി കൊവിഡ് ബാധിച്ച് ചികിത്സയിലുള്ളത്.
മഹാരാഷ്ട്രയിലാണ് ഏറ്റവും കൂടുതല്‍ കൊവിഡ് ബാധിതര്‍ ഉള്ളത്. മഹാരാഷ്ട്രയില്‍ ആയിരത്തി എഴുന്നൂറിലധികം പേരാണ് രോഗം ബാധിച്ച് മരിച്ചത്. 54758 പേര്‍ക്കാണ് സംസ്ഥാനത്ത് രോഗം ബാധിച്ചത്. മഹാരാഷ്ട്രയ്ക്ക് പുറമെ തമിഴ്‌നാട്, ഗുജറാത്ത് സംസ്ഥാനങ്ങളിലാണ് ഏറ്റവും കൂടുതല്‍ രോഗികള്‍. തമിഴ്‌നാട്ടില്‍ 17728 പേര്‍ക്കും ഗുജറാത്തില്‍ 14821 പേര്‍ക്കും വൈറസ് ബാധ സ്ഥിരീകരിച്ചു.
അതേസമയം, കൊവിഡ് രോഗികള്‍ ഇരട്ടിച്ചതോടെ തമിഴ്‌നാട്ടില്‍ ആശുപത്രികള്‍ നിറഞ്ഞു. കിടക്കകള്‍ കിട്ടാതായതോടെ ആശുപത്രിയുടെ പുറത്ത് കൊവിഡ് രോഗികളുടെ നീണ്ട നിരയാണ്. കടുത്ത ലക്ഷ്ണം ഇല്ലാത്ത കൊവിഡ് രോഗികളെ നിര്‍ബന്ധിച്ച് വീടുകളിലേക്ക് തിരിച്ചയക്കുകയാണ്.