മണിപ്പൂരില്‍ ഏറ്റുമുട്ടല്‍: 12 പേര്‍ കൊല്ലപ്പെട്ടു; ഒരു സിആര്‍പിഎഫ് ജവാനും പരിക്ക്
കുക്കി വിഭാഗത്തിലെ സായുധഗറില്ലകളാണ് ആക്രമണം നടത്തിയതെന്നാണ് സൂചന
ഇംഫാല്‍: മണിപ്പൂരില്‍ സൈനിക കാംപിന് നേരെ ആക്രമണം. ആക്രമിക്കാനെത്തിയ സംഘത്തിലെ 12 പേര്‍ കൊല്ലപ്പെട്ടു. ഒരു സിആര്‍പിഎഫ് ജവാന് പരിക്കേറ്റു. കുക്കി വിഭാഗത്തിലെ സായുധഗറില്ലകളാണ് ആക്രമണം നടത്തിയതെന്നാണ് സൂചന.
മണിപ്പൂര്‍ അസം അതിര്‍ത്തിയിലെ ജിരിബാം ജില്ലയിലാണ് ആക്രമണമുണ്ടായത്. ജിരിബാമിലെ പോലിസ് സ്‌റ്റേഷന്‍ രണ്ടു വശത്ത് നിന്നും കുക്കികള്‍ ആക്രമിക്കുകയായിരുന്നുവെന്ന് റിപോര്‍ട്ടുകള്‍ പറയുന്നു. പോലിസ് സ്‌റ്റേഷന്‍ ആക്രമിച്ച ശേഷം പ്രദേശത്തെ അഭയാര്‍ത്ഥി ക്യാംപിലേക്ക് സംഘം നീങ്ങിയത്രെ. അവിടെ വച്ചാണ് സിആര്‍പിഎഫുമായി ഏറ്റുമുട്ടലുണ്ടായത്. കൊലപാതകത്തില്‍ പ്രതിഷേധിച്ച് ശക്തികേന്ദ്രങ്ങളില്‍ കുക്കി സംഘടനകള്‍ ബന്ദ് പ്രഖ്യാപിച്ചു.