എസ്‌ഐയെ ലോറിയിടിപ്പിച്ച് കൊലപ്പെടുത്തി; കോണ്‍സ്റ്റബിളിന് ഗുരുതര പരിക്ക്, പ്രതി ഒളിവില്‍
തൂത്തുക്കുടിയിലെ ഇറാല്‍ പോലിസ് സ്‌റ്റേഷനിലെ എസ്‌ഐ ബാലുവാണ് കൊല്ലപ്പെട്ടത്. ഒപ്പമുണ്ടായിരുന്ന കോണ്‍സ്റ്റബിള്‍ പൊന്‍സുബ്ബയ്യയെ ഗുരുതര പരിക്കുകളോടെ ആശുപത്രിയില്‍ പ്രവേശിപ്പിച്ചു.
ചെന്നൈ: തൂത്തുക്കുടിയില്‍ എസ്‌ഐയെ ലോറിയിടിപ്പിച്ച് കൊലപ്പെടുത്തി. തൂത്തുക്കുടിയിലെ ഇറാല്‍ പോലിസ് സ്‌റ്റേഷനിലെ എസ്‌ഐ ബാലുവാണ് കൊല്ലപ്പെട്ടത്. ഒപ്പമുണ്ടായിരുന്ന കോണ്‍സ്റ്റബിള്‍ പൊന്‍സുബ്ബയ്യയെ ഗുരുതര പരിക്കുകളോടെ ആശുപത്രിയില്‍ പ്രവേശിപ്പിച്ചു. കെര്‍ക്കെ ജങ്ഷനില്‍ തിങ്കളാഴ്ച പുലര്‍ച്ചെ ഒരു മണിയോടെയാണ് നാടിനെ നടുക്കിയ സംഭവം.
പുലര്‍ച്ചെ കെര്‍ക്കെ ജങ്ഷനിലെ ഒരു ഹോട്ടലില്‍ സംഘര്‍ഷം പരിഹരിക്കാനെത്തിയതായിരുന്നു എസ്‌ഐ ബാലുവും കോണ്‍സ്റ്റബിള്‍ പൊന്‍സുബ്ബയ്യയും. തുടര്‍ന്ന് തര്‍ക്കം പരിഹരിച്ചശേഷം ഇരുവരും തിരിച്ചുപോവുന്നതിനിടെ ഹോട്ടലിലെ പ്രശ്‌നക്കാരിലൊരാളായ മുരുകവേല്‍ എന്ന യുവാവ് മദ്യലഹരിയില്‍ പോലിസുകാരോട് തട്ടിക്കയറി. തുടര്‍ന്ന് ഇയാളെ പിന്തിരിപ്പിച്ചയച്ച ശേഷം പോലിസുകാര്‍ ഇരുചക്രവാഹനത്തില്‍ കയറി തിരിച്ചുപോവുന്നതിനിടെ ലോറിയില്‍ പിന്തുടര്‍ന്നെത്തി പോലിസുകാര്‍ സഞ്ചരിച്ച ഇരുചക്രവാഹനത്തിലിടിപ്പിക്കുകയായിരുന്നു. എസ്‌ഐ ബാലു സംഭവസ്ഥലത്തുവച്ച് തന്നെ മരിച്ചു. സംഭവത്തിനു ശേഷം ഒളിവില്‍ പോയ പ്രതിക്കായി പോലിസ് വ്യാപക തിരച്ചില്‍ നടത്തിവരികയാണ്.