കോട്ടയം:പാലാ വള്ളിച്ചിറയില്‍ വയോധികന്‍ കുത്തേറ്റു മരിച്ചു. വള്ളിച്ചിറ വലിയകാലായില്‍ പി ജെ ബേബി(71) ആണ് മരിച്ചത്. വക്കീല്‍ ബേബി എന്ന് അറിയപ്പെടുന്ന വള്ളിച്ചിറ സ്വദേശി ആരംകുഴക്കല്‍ എ എല്‍ ഫിലിപ്പോസാണ് കുത്തിയത്. ഇരുവരും തമ്മില്‍ സാമ്പത്തിക ഇടപാടുകള്‍ നിലവില്‍ ഉണ്ടായിരുന്നു. പരസ്പര ജാമ്യത്തില്‍ സഹകരണ ബാങ്കില്‍ നിന്നും ലോണ്‍ എടുത്തതും നിലവിലുണ്ട്. ഇത് സംബന്ധിച്ച് ഇരുവരും തമ്മില്‍ കാലങ്ങളായി തര്‍ക്കങ്ങളും നിലവിലുണ്ടായിരുന്നു.
ഫിലിപ്പോസിന്റെ പേരിലുള്ള ഹോട്ടല്‍ ആറുമാസമായി മറ്റൊരാള്‍ക്ക് ദിവസവാടകയ്ക്ക് നല്‍കിയിരിക്കുകയാണ്. ഇവിടെ ചായ കുടിക്കാന്‍ എത്തിയതായിരുന്നു ഇരുവരും. പള്ളിയിലേക്ക് പോകും വഴിയാണ് ബേബി ഹോട്ടലില്‍ കയറിയത്. തുടര്‍ന്ന് ഇരുവരും തമ്മില്‍ തര്‍ക്കം ഉണ്ടാവുകയും ഫിലിപ്പോസ് കത്തിയെടുത്ത് ബേബിയെ കുത്തുകയുമായിരുന്നു. ഫിലിപ്പോസ് ഓടി രക്ഷപ്പെട്ടു. നെഞ്ചില്‍ കുത്തേറ്റ ബേബിയെ രക്ഷിക്കാനായില്ല. മൃതദേഹം പാലായിലെ സ്വകാര്യ ആശുപത്രിയിലേക്ക് മാറ്റി.
