നോയിഡ: ഉത്തര്‍പ്രദേശിലെ ഗ്രേറ്റര്‍ നോയിഡയില്‍ യുവാവിനെ തല്ലിക്കൊന്നു. സംഭാലില്‍ നിന്നുള്ള ഷാരൂഖ്(22) ആണ് കൊല്ലപ്പെട്ടത്. പ്രായപൂര്‍ത്തിയാവാത്ത പ്രതിയെ കസ്റ്റഡിയിലെടുത്തു. പ്രതി മദ്യലഹരിയിലായിരുന്നുവെന്ന് പോലിസ് പറഞ്ഞു. സൂരജ്പൂര്‍ മേഖലയില്‍ ചൊവ്വാഴ്ച വൈകീട്ടാണ് സംഭവം. ഒന്നിച്ച് വാടകവീട്ടില്‍ താമസിക്കുന്ന ഇരുവരും തമ്മിലുണ്ടായ വാക്കുതര്‍ക്കത്തിനിടെ സംഘര്‍ഷമുണ്ടായത്. സംഭവത്തില്‍ കേസെടുത്തതായി അഡീഷനല്‍ ഡിസിപി(സെന്‍ട്രല്‍ നോയിഡ) ഹിര്‍ദേഷ് കതേരിയ പറഞ്ഞു. പ്രായപൂര്‍ത്തിയാവാത്തയാളാണെന്ന സംശയത്തെ തുടര്‍ന്ന് പ്രായം പരിശോധിക്കുകയാണെന്നും അദ്ദേഹം പറഞ്ഞു. ഇരുവരും ഒരേ വീട്ടില്‍ വാടകക്കാരായി താമസിക്കുന്ന സുഹൃത്തുക്കളോ പരിചയക്കാരോ ആണെന്നും പോലിസ് വ്യക്തമാക്കി. വാക്കുതര്‍ക്കത്തിനിടെ വടികൊണ്ട് തലയക്കടിക്കുകയായിരുന്നു. ഉടന്‍ ആശുപത്രിയില്‍ എത്തിച്ചെങ്കിലും ഷാരൂഖിന്റെ ജീവന്‍ രക്ഷിക്കാനായില്ല.