തിരുവനന്തപുരം: സംസ്ഥാനത്ത് പുതുക്കിയ ബസ്, ഓട്ടോ, ടാക്‌സി നിരക്കുകള്‍ ഇന്ന് പ്രാബല്യത്തിലായി. ഇതനുസരിച്ച് സിറ്റി, ടൗണ്‍, സിറ്റി സര്‍ക്കുലര്‍, സിറ്റി ഷട്ടില്‍ ഉള്‍പ്പെടെയുള്ള ഓര്‍ഡിനറി, ഗ്രാമീണ സര്‍വീസുകളുടെ മിനിമം നിരക്കും വര്‍ധിച്ചു. ഓര്‍ഡിനറി ബസ്സുകളുടെ മിനിമം നിരക്ക് എട്ടുരൂപയില്‍നിന്ന് 10 രൂപയായാണ് വര്‍ധിച്ചത്. ഓട്ടോറിക്ഷകളുടെ മിനിമം നിരക്ക് 25 രൂപയില്‍ നിന്ന് 30 രൂപയായി. ഓട്ടോ മിനിമം ചാര്‍ജ് 30 (1.5 കി.മീറ്റര്‍) രൂപ. ഓരോ കി.മീറ്ററിനും 15 രൂപ വീതം അധികം നല്‍കണം. 1500 സിസിക്ക് താഴെയുള്ള ടാക്‌സി കാര്‍ 200 രൂപ (5 കി.മീറ്റര്‍), ഓരോ കി.മീറ്ററിനും 18 രൂപ വീതം അധികമായി നല്‍കണം. 1500 സിസിക്ക് മുകളില്‍ 225 രൂപ. (5 കി.മീറ്റര്‍) ഓരോ കി.മീറ്ററിനും 20 രൂപ വീതം നല്‍കണം. ഇതിന് പുറമേ നാല് ചക്ര ഓട്ടോ, ടാക്‌സി എന്നിവയുടെ നിരക്കും കൂടും.
ഓര്‍ഡിനറി ബസ് നിരക്കിന് ആനുപാതികമായി കെഎസ്ആര്‍ടിസിയുടെ ഫാസ്റ്റ്, സൂപ്പര്‍ഫാസ്റ്റ് സര്‍വീസുകളുടെ നിരക്കുകളും വര്‍ധിച്ചു. അഞ്ച് കിലോമീറ്ററാണ് മിനിമം ദൂരത്തില്‍ ഫാസ്റ്റുകളില്‍ സഞ്ചരിക്കാവുന്ന ദൂരം. സൂപ്പര്‍ ഫാസ്റ്റുകളുടേത് 10 കിലോ മീറ്ററും. അതേസമയം, എക്‌സ്പ്രസ്, സൂപ്പര്‍ എക്‌സ്പ്രസ്, സൂപ്പര്‍ എയര്‍ എക്‌സ്പ്രസ്, സൂപ്പര്‍ ഡീലക്‌സ്, സെമീ സ്ലീപ്പര്‍, സിംഗിള്‍ ആക്‌സില്‍ സര്‍വീസുകള്‍, മള്‍ട്ടി ആക്‌സില്‍ സര്‍വീസുകള്‍, ലോ ഫ്‌ളോര്‍ എസി എന്നിവയുടെ മിനിമം നിരക്ക് വര്‍ധിപ്പിച്ചിട്ടില്ല. സൂപ്പര്‍ എക്‌സ്പ്രസുകളില്‍ മിനിമം നിരക്ക് മാറ്റാതെ തന്നെ സഞ്ചരിക്കാവുന്ന ദൂരം വര്‍ധിപ്പിച്ചിട്ടുണ്ട്. നിലവില്‍ 28 രൂപയ്ക്ക് 10 കിലോമീറ്ററാണ് എക്‌സ്പ്രസ്, സൂപ്പര്‍ എക്‌സ്പ്രസ് ബസ്സുകളില്‍ സഞ്ചരിക്കാവുന്നത്.
ഇനി മുതല്‍ 28 രൂപയ്ക്ക് 15 കിലോമീറ്റര്‍ ദൂരം സഞ്ചരിക്കാം. കെഎസ്ആര്‍ടിസി നോണ്‍ എസി ജന്റം ബസ്‌കളുടെ മിനിമം നിരക്ക് 13 രൂപയില്‍ നിന്ന് 10 രൂപയായി കുറയും. 2.5 കിലോമീറ്ററാണ് മിനിമം നിരക്കില്‍ സഞ്ചരിക്കാവുന്ന ദൂരം. ജന്റം എസി ബസ്സുകളുടെ മിനിമം നിരക്ക് 26 രൂപയായി നിലനിര്‍ത്തി. അതേ സമയം കിലോമീറ്റര്‍ നിരക്ക് 1.87 രൂപയില്‍ നിന്ന് 1.75 രൂപയായി കുറഞ്ഞിട്ടുണ്ട്. എ സി ലോഫ്‌ലോറില്‍ സഞ്ചരിക്കാവുന്ന ദൂരം അഞ്ച് കിലോമീറ്ററാണ്. ഓട്ടോ-ടാക്‌സി നിരക്ക് വര്‍ധന സംബന്ധിച്ച സര്‍ക്കാര്‍ വിജ്ഞാപനം രണ്ടുദിവസം മുമ്പ് പുറത്തിറങ്ങിയിരുന്നു. എന്നാല്‍, ശനിയാഴ്ച ഉച്ചയോടെയാണ് ബസ് ചാര്‍ജ് വര്‍ധിപ്പിച്ചുള്ള വിജ്ഞാപനമിറങ്ങിയത്.