ഇംഗ്ലിഷ് പ്രീമിയര്‍ ലീഗ്; ലിവര്‍പൂള്‍ വീണ്ടും തലപ്പത്ത്

ലണ്ടന്‍: ഇംഗ്ലിഷ് പ്രീമിയര്‍ ലീഗില്‍ ലിവര്‍പൂള്‍ ഒന്നാം സ്ഥാനത്ത് തിരിച്ചെത്തി. ബേണ്‍മൗത്തിനെതിരേ 3-0ത്തിന്റെ ജയത്തോടെയാണ് ലിവര്‍പൂള്‍ കൈവിട്ട ഒന്നാം സ്ഥാനം തിരിച്ചുപിടിച്ചത്. സാഡിയോ മാനേ(24), ജിയോര്‍ജിനിയോ വിനാല്‍ഡം(34), മുഹമ്മദ് സലാ(48) എന്നിവരാണ് ലിവര്‍പൂളിന് വേണ്ടി ഗോള്‍ നേടിയത്. ബേണ്‍മൗത്തിന്റെ തുടര്‍ച്ചയായ എട്ടാം തോല്‍വിയാണ്. മൂന്ന് തുടര്‍ച്ചയായ സമനിലയെ തുടര്‍ന്നാണ് ഒന്നാം സ്ഥാനത്തുള്ള ലിവര്‍പൂള്‍ ഗോള്‍ ശരാശരിയില്‍ രണ്ടാം സ്ഥാനത്തേക്ക് പിന്തള്ളപ്പെട്ടത്. തുടര്‍ന്നാണ് മാഞ്ചസ്റ്റര്‍ സിറ്റി ഒന്നാം സ്ഥാനത്തെത്തിയത്. ഇന്നലെ നടന്ന മറ്റ് ലീഗ് മല്‍സരങ്ങളില്‍ മാഞ്ചസ്റ്റര്‍ യുനൈറ്റഡ് ഫുള്‍ഹാമിനെ 3-0ത്തിനും ആഴ്‌സണല്‍ ഹഡേഴ്‌സ്ഫീല്‍ഡിനെ 2-1നും കാര്‍ഡിഫ് സൗത്ത്ഹാംട്ടണെ 2-1നും തോല്‍പ്പിച്ചു. വെസ്റ്റ്ഹാം -ക്രിസ്റ്റല്‍ പാലസ് മല്‍സരം സമനിലയില്‍ കലാശിച്ചു. ഫുള്‍ഹാമിനെതിരേ മാഞ്ചസ്റ്റര്‍ യുനൈറ്റഡിനായി പോഗ്‌ബേ(14,65), മാര്‍ഷ്യല്‍(23) എന്നിവര്‍ ഗോള്‍ നേടി. പോഗ്‌ബേ ഇരട്ടഗോള്‍ നേടി. ഈ സീസണിലെ പോഗ്‌ബേയുടെ 11ാം ഗോളാണിത്. ജയത്തോടെ യുനൈറ്റഡ് ടോപ് ഫോറില്‍ ഇടം നേടി. ചെല്‍സി അഞ്ചാം സ്ഥാനത്തേക്കും വീണു. ഹഡേഴ്‌സ്ഫീല്‍ഡിനെതിരേ ആഴ്‌സണലിനായി ഇവോബി(16), ലക്കാസേറ്റേ(44) എന്നിവരാണ് ഗോള്‍ നേടിയത്. ഹഡേഴ്‌സിന്റെ ആശ്വാസഗോള്‍ കോള്‍സിനാക്ക്(90+3) നേടി. ലീഗില്‍ ടോട്ടണ്‍ഹാം, യുനൈറ്റഡ്, ചെല്‍സി, ആഴ്‌സണല്‍ എന്നിവരാണ് മൂന്ന് മുതല്‍ ആറ് വരെയുള്ള സ്ഥാനങ്ങളില്‍.