'80ാം വയസ്സില്‍ വീല്‍ചെയറില്‍ ആണെങ്കിലും ധോണി ടീമിലുണ്ടാകും'-പറയുന്നത് ഇതിഹാസ താരം
ലണ്ടന്‍: ധോണിക്കെതിരായ വിമര്‍ശനങ്ങളെ പരിഹസിച്ച് എബി ഡിവില്ലിയേഴ്‌സ്. ടീമിന് വേണ്ടി കാര്യമായതൊന്നും ധോണി ചെയ്യുന്നില്ലെന്ന് പറയുന്നവരെ കണക്കിന് പരിഹസിക്കുന്നതാണ് മുന്‍ ദക്ഷിണാഫ്രിക്കന്‍ താരവും ക്രിക്കറ്റ് ഇതിഹാസവുമായ എബി ഡിവില്ലിയേഴ്‌സിന്റെ പ്രതികരണം.
എന്റെ ടീമില്‍ ധോണിയെ എന്നും കളിപ്പിക്കും. അതിപ്പോ 80 വയസ്സായാലും വീല്‍ ചെയറിലായാലും, അദ്ദേഹത്തിന് തന്റെ ടീമിലിടമുണ്ടാകും. ആ റെക്കോഡുകള്‍ നോക്ക്. അതുപോലാരാളെ മാറ്റി നിര്‍ത്താനാകുമോ? എന്നായിരുന്നു ക്രിക്കറ്റ് ലോകം കണ്ട എക്കാലത്തേയും മികച്ച താരങ്ങളിലൊരാളുടെ പ്രതികരണം. ധോണിയെ പോലൊരു താരമുള്ളത് ഇന്ത്യയുടെ ഭാഗ്യമാണെന്നും ഡിവില്ലിയേഴ്‌സ് അഭിപ്രായപ്പെട്ടു. ഇന്ത്യന്‍ ക്രിക്കറ്റ് ആരാധകരും നിരീക്ഷകരുമെല്ലാം കഴിഞ്ഞ കുറച്ച് നാളുകളായി ചര്‍ച്ച ചെയ്തു കൊണ്ടിരിക്കുന്നതാണ് മുന്‍ നായകന്‍ എംഎസ് ധോണിയുടെ ഫോമില്ലായ്മ.