ജംഷഡ്പൂര്‍: ഇന്നലെ ജംഷഡ്പൂരിനെതിരെ നടന്ന മല്‍സരത്തില്‍ സമനില ഗോള്‍ കണ്ടെത്തിയതോടെ ബ്ലാസ്റ്റേഴ്സില് ഇയാന്‍ ഹ്യൂമിന്റെ റെക്കോഡ് ഗോള്‍നേട്ടത്തെ മറികടന്ന് മലയാളി താരം സി കെ വിനീത്. ഈ ഗോള്‍ നേട്ടത്തോടെ കേരള ബ്ലാസ്റ്റേഴ്സിന്റെ എക്കാലത്തെയും ടോപ് സ്‌കോറര്‍ പദവിയാണ് താരത്തെ തേടിയെത്തിയിരിക്കുന്നത്. തുടക്കം മുതല്‍ ബ്ലാസ്റ്റേഴ്‌സിനൊപ്പമുണ്ടായിരുന്ന താരത്തിന്റെ കേരള ബ്ലാസ്റ്റേഴ്സ് കരിയറിലെ 11-ാം ഗോളായിരുന്നു ഇത്. ജംഷഡ്പൂരിനെതിരായ മല്‍സരത്തിന് മുമ്പ് വരെ 10 ഗോളുമായി വിനീതും ഹ്യുമുമായിരുന്നു ഈ നേട്ടത്തില്‍ ഒന്നാം സ്ഥാനത്ത്.
കഴിഞ്ഞ മല്‍സരത്തില്‍ ഡല്‍ഹി ഡൈനാമോസിനെതിരെ നേടിയ ഗോള്‍ ഇയാന്‍ ഹ്യൂമിന്റെ 10 ഗോളിനൊപ്പം വിനീതിനെ എത്തിച്ചിരുന്നു. 36 മല്‍സരങ്ങളില്‍ നിന്നാണ് സി കെ വിനീത് ഈ നേട്ടത്തില്‍ എത്തിയത്. 2016 സീസണില്‍ 5 ഗോളുകളും കഴിഞ്ഞ സീസണില്‍ നാലു ഗോളുകളും സി കെ വിനീത് കേരള ബ്ലാസ്‌റ്റേഴ്‌സിനായി നേടിയിരുന്നു. സീസണില്‍ ഇതുവരെ രണ്ട് ഗോളുകളാണ് താരത്തിന്റെ അക്കൗണ്ടിലുള്ളത്. കൂടാതെ മൂന്ന് അസിസ്റ്റുകളും സി കെ വിനീതിന്റെ ബൂട്ടുകളില്‍ നിന്നും പിറന്നു.