കോഴിക്കോട്: ചേവായൂര്‍ സഹകരണബാങ്ക് തിരഞ്ഞെടുപ്പ് സംഘര്‍ഷത്തെ തുടര്‍ന്ന് കോഴിക്കോട് ജില്ലയില്‍ കോണ്‍ഗ്രസ് പ്രഖ്യാപിച്ച ഹര്‍ത്താലിനിടെ സമരാനുകൂലികളും പോലിസും തമ്മില്‍ സംഘര്‍ഷം. ബസ് തടഞ്ഞ കോണ്‍ഗ്രസ് പ്രവര്‍ത്തകര്‍ അറസ്റ്റിലായി. കോണ്‍ഗ്രസ് ബ്ലോക്ക് പ്രസിഡന്റടക്കം ആറുപേരാണ് അറസ്റ്റിലായത്. കെഎസ്ആര്‍ടിസി ബസുകള്‍ അടക്കം തടയാന്‍ ശ്രമിച്ചത് സംഘര്‍ഷത്തിനിടയാക്കി. മലയോര, ഗ്രാമീണ മേഖലകളില്‍ പൂര്‍ണം. മുക്കത്ത് സമരാനുകൂലികള്‍ കടകള്‍ അടപ്പിച്ചു.
രാവിലെ ആറ് മുതല്‍ വൈകിട്ട് ആറ് വരെയാണ് ഹര്‍ത്താലിന് ആഹ്വാനം ചെയ്തത്. പാല്‍, പത്രം, ആംബുലന്‍സ് തുടങ്ങിയ അവശ്യ സര്‍വീസുകളെ ഹര്‍ത്താലില്‍ നിന്ന് ഒഴിവാക്കിയിരുന്നു. ഹര്‍ത്താലുമായി സഹകരിക്കില്ലെന്ന് കേരള വ്യാപാരി വ്യവസായി ഏകോപനസമിതി നേരത്തെ അറിയിച്ചിരുന്നു. എന്നാല്‍ പല സ്ഥലങ്ങളിലും സമരാനുകൂലികള്‍ കടയടപ്പിക്കാന്‍ ശ്രമിച്ചു. ചേവായൂര്‍ സഹകരണ ബാങ്ക് തിരഞ്ഞെടുപ്പുമായി ബന്ധപ്പെട്ട് ഉടലെടുത്ത സംഘര്‍ഷത്തില്‍ പോലിസ് പക്ഷപാതപരമായി പെരുമാറി എന്നു ചൂണ്ടികാട്ടിയാണ് ഹര്‍ത്താല്‍.