ഓടിക്കൊണ്ടിരുന്ന ബസിന്റെ വാതില്‍ തുറന്ന് റോഡിലേക്കുവീണ് യാത്രക്കാരന് ഗുരുതര പരിക്ക്

തിരുവനന്തപുരം: ഓടിക്കൊണ്ടിരുന്ന കെ.എസ്.ആര്‍.ടി.സി ബസിന്റെ വാതില്‍ തുറന്ന് റോഡിലേക്ക് വീണ യാത്രക്കാരന് ഗുരുതര പരിക്ക്. പുല്ലുവിള പള്ളികെട്ടിയ പുരയിടത്തില്‍ പൗലോസിനാണ് (50) തലയ്ക്ക് ഗുരുതര പരിക്കേറ്റത്. ഇന്നലെ വൈകിട്ട് തെന്നൂര്‍ക്കോണത്തുവച്ചായിരുന്നു അപകടം.

ബസിന്റെ പടിയില്‍ വീണ നാണയമെടുക്കാന്‍ കുനിഞ്ഞപ്പോള്‍ വാതില്‍ തുറന്ന് പുറത്തേക്ക് വീഴുകയായിരുന്നെന്ന് ബന്ധുക്കള്‍ പറഞ്ഞു. എന്നാല്‍ അപകടശേഷം ബസ് നിറുത്താതെ പോയെന്ന് പരാതിയുണ്ട്. തിരുവനന്തപുരത്തു നിന്നു വിഴിഞ്ഞം വഴി പൂവാറിലേക്ക് പോയ ബസിലാണ് സംഭവം. കഴിഞ്ഞ ദിവസം ഇതേറൂട്ടിൽ കോവളം ബൈപ്പാസിൽ ഓടിക്കൊണ്ടിരുന്ന കെഎസ്ആർടിസി ബസിന്റെ ഡോർ തുറന്ന് പുറത്തേക്ക് വീണ് രണ്ട് വിദ്യാർഥികൾക്ക് പരിക്കേറ്റിരുന്നു.