തലശ്ശേരി: സിപിഐ കണ്ണൂര്‍ ജില്ലാ സെക്രട്ടറിയായി സി പി സന്തോഷ് കുമാറിനെ തിരഞ്ഞെടുത്തു. ആദ്യകാല സിപിഐ(എംഎല്‍), മെയ്ദിന തൊഴിലാളി കേന്ദ്രം എന്നിവയുടെ നേതാവായിരുന്ന സി പി വിജയന്റെയും കെ പി മാലിനിയുടെയും മകനായ സി പി സന്തോഷ് കുമാര്‍ ഹാന്‍വീവിലെ മുന്‍ ജീവനക്കാരനാണ്. 1976ല്‍ എഐവൈഎഫ് വളപട്ടണം യൂനിറ്റ് സെക്രട്ടറി, 79ല്‍ സിപിഐ ബ്രാഞ്ച് അസിസ്റ്റന്റ് സെക്രട്ടറി, വളപട്ടണം എഐടിയുസി ഓഫിസ് സെക്രട്ടറി, എഐവൈഎഫ് കണ്ണൂര്‍ താലൂക്ക് പ്രസിഡന്റ്, സെക്രട്ടറി, ജില്ലാ വൈസ് പ്രസിഡന്റ്, ജോയിന്റ് സെക്രട്ടറി എന്നീ പദവികള്‍ വഹിച്ചു.
പാര്‍ട്ടി കണ്ണൂര്‍ താലൂക്ക് കമ്മിറ്റി അംഗവും സെക്രട്ടേറിയറ്റ് അംഗവും എട്ടുവര്‍ഷം ജില്ലാ അസിസ്റ്റന്റ് സെക്രട്ടറിയുമായിരുന്നു. 10 വര്‍ഷം മുമ്പാണ് സിപിഐ സംസ്ഥാന കൗണ്‍സിലിലിലേക്ക് തിരഞ്ഞെടുക്കപ്പെട്ടത്. നിലവില്‍ സംസ്ഥാന കൗണ്‍സില്‍ അംഗം, എഐടിയുസി സംസ്ഥാന എക്‌സിക്യൂട്ടീവ്, ദേശീയ കൗണ്‍സില്‍ അംഗം തുടങ്ങിയ ചുമതലകള്‍ വഹിക്കുന്നു. ഒമ്പതുവര്‍ഷമായി എഐടിയുസി ജില്ലാ ജനറല്‍ സെക്രട്ടറിയാണ്. സിപിഐ ജില്ലാ എക്‌സിക്യൂട്ടീവ് അംഗവും കേരള മഹിളാ സംഘം സംസ്ഥാന ജോയിന്റ് സെക്രട്ടറിയും കണ്ണൂര്‍ കോര്‍പറേഷന്‍ കൗണ്‍സിലറുമായ എന്‍ ഉഷയാണ് ഭാര്യ. 39 അംഗ ജില്ലാ കൗണ്‍സിലിനെയും 14 അംഗ സംസ്ഥാന സമ്മേളന പ്രതിനിധികളെയും തിരഞ്ഞെടുത്തു.