കൊവിഡ്: മരിച്ചവരുടെ വനിതാ ആശ്രിതര്‍ക്കായുള്ള 'സ്‌മൈല്‍ കേരള' വായ്പാ പദ്ധതിയിലേക്ക് അപേക്ഷിക്കാം
കോഴിക്കോട്: കൊവിഡ് 19 ബാധിച്ച് മുഖ്യവരുമാനാശ്രയമായ വ്യക്തി മരണപ്പെട്ട പട്ടികവര്‍ഗ, ന്യൂനപക്ഷ, പൊതുവിഭാഗം കുടുംബങ്ങളെ സഹായിക്കുന്നതിന് കേരള സര്‍ക്കാരിന്റെയും കേരള സംസ്ഥാന വനിതാ വികസന കോര്‍പറേഷന്റെയും സംരംഭമായ 'സ്‌മൈല്‍ കേരള' സ്വയം തൊഴില്‍ വായ്പാ പദ്ധതിയിലേക്ക് അപേക്ഷിക്കാം. ആറ് ശതമാനം വാര്‍ഷിക പലിശനിരക്കില്‍ പരമാവധി അഞ്ചുലക്ഷം രൂപ വരെയാണ് വായ്പയായി ലഭിക്കുന്നത്.
വായ്പാ തുകയുടെ 20 ശതമാനം അല്ലെങ്കില്‍ പരമാവധി ഒരു ലക്ഷം രൂപ വരെ സബ്‌സിഡി ലഭിക്കും. 18 നും 55 നുമിടയില്‍ പ്രായമുള്ള മുഖ്യവരുമാനശ്രായമായ വ്യക്തി കൊവിഡ് ബാധിച്ച് മരിച്ചാല്‍ അവരുടെ വനിതകളായ ആശ്രിതര്‍ക്കാണ് വായ്പ ലഭിക്കുക. കുടുംബ വാര്‍ഷിക വരുമാനം മൂന്നുലക്ഷം രൂപയില്‍ കവിയരുത്. അപേക്ഷകര്‍ കേരളത്തില്‍ സ്ഥിരതാമസക്കാരിയായിരിക്കണം. വിശദവിവരങ്ങള്‍ക്കും അപേക്ഷക്കുമായി www.kswdc.org ലോ 0491 2544090, 8606149753 നമ്പറിലോ ബന്ധപ്പെടണം.