തമിഴ്‌നാട്ടില്‍ വിദേശത്തുനിന്നെത്തിയ 18 പേര്‍ക്കുകൂടി കൊവിഡ്; സാംപിളുകള്‍ ജിനോം പരിശോധനക്കയച്ചു
ചെന്നൈ: ഹൈ റിസ്‌ക് വിഭാഗത്തിലുള്‍പ്പെട്ട വിദേശത്തുനിന്നെത്തിയ 18 യാത്രക്കാര്‍ക്കു കൂടി തമിഴ്‌നാട്ടില്‍ കൊവിഡ് സ്ഥിരീകരിച്ചു. ഇവരുടെ ആര്‍ടിപിസിആര്‍ പരിശോധനാ ഫലം പോസിറ്റീവായതിനെത്തുടര്‍ന്ന് സാംപിളുകള്‍ ജീനോ പരിശോധനക്കായി ലാബിലേക്കയച്ചതായി മന്ത്രി എം എ സുബ്രഹ്മണ്യന്‍ അറിയിച്ചു .
എല്ലാവര്‍ക്കും ഡല്‍റ്റാ വകഭേദമാണ് ബാധിച്ചിട്ടുള്ളതെന്ന് മന്ത്രി അറിയിച്ചു.
18 യാത്രക്കാര്‍ക്കും കൊവിഡ് ഡെല്‍റ്റാ പരിശോധനാഫലം പോസിറ്റീവായി. അവരുടെ സാംപിളുകള്‍ ബെംഗളൂരുവിലെ ഇന്‍സ്റ്റെം ലാബില്‍ ജീനോം സീക്വന്‍സിങ്ങിനയച്ചു- ചെന്നൈയിലെ മാസ് വാക്‌സിനേഷന്‍ ഡ്രൈവില്‍ പങ്കെടുത്തശേഷം വാര്‍ത്താമാധ്യമങ്ങളോട് സംസാരിക്കുകയായിരുന്നു അദ്ദേഹം.
18 പേരില്‍ 9 പേര്‍ ഗിണ്ടിയിലും രണ്ട് പേര്‍ ചെന്നൈയിലും നാല് പേര്‍ തിരിച്ചിറപ്പള്ളിയിലും രണ്ട് പേര്‍ നാഗര്‍കോവിലിലുമാണ്. ഒരാള്‍ ബെംഗളൂരുവിലും ചികില്‍സ തേടി.
രാജ്യത്ത് ഇതുവരെ 33 പേര്‍ക്കാണ് കൊവിഡ് ഒമിക്രോണ്‍ വകഭേദം സ്ഥിരീകരിച്ചത്. ഇതുവരെയും ഈ വകഭേദം മൂലം ആരും മരിച്ചിട്ടില്ല. രാജ്യത്ത് പൊതുവെ ഒമിക്രോണ്‍ വകഭേദം ബാധിച്ചവര്‍ക്ക് രോഗലക്ഷണങ്ങളില്ല.