ഭോപാല്‍: ഭാരത് ജോഡോ യാത്രയ്ക്കിടെ രാഹുല്‍ ഗാന്ധിയെ വധിക്കുമെന്ന് ഭീഷണി മുഴക്കിയയാള്‍ അറസ്റ്റിലായി. ഉത്തര്‍പ്രദേശിലെ റായ്ബറേലി സ്വദേശിയായ നരേന്ദ്ര സിങ് എന്നയാളെ മധ്യപ്രദേശ് ഉജ്ജയിന്‍ ജില്ലയിലെ നഗ്ദയില്‍ നിന്നുമാണ് പോലിസ് പിടികൂടിയത്. രാഹുല്‍ഗാന്ധി ഇന്‍ഡോറിലെത്തുമ്പോള്‍ വധിക്കുമെന്നായിരുന്നു ഇയാളുടെ ഭീഷണി. നഗ്ദ പോലീസാണ് ഇയാളെ പിടികൂടിയത്. തുടര്‍ന്ന് ഇന്‍ഡോര്‍ ക്രൈംബ്രാഞ്ചിനെ വിവരമറിയിച്ചു. ഇന്‍ഡോര്‍ പോലിസ് നല്‍കിയ ഫോട്ടോയുടെ അടിസ്ഥാനത്തിലായിരുന്നു അറസ്‌റ്റെന്ന് നഗ്ദ എസ്പി സത്യേന്ദ്രകുമാര്‍ ശുക്ല അറിയിച്ചു.
ഭാരത് ജോഡോ യാത്രക്കായി രാഹുല്‍ ഗാന്ധി ഇന്‍ഡോറിലെത്തിയാല്‍ അദ്ദേഹത്തെ ബോംബ് ഉപയോഗിച്ച് കൊലപ്പെടുത്തുമെന്നായിരുന്നു ഭീഷണി. രാഹുലിനെതിരേ ഭീഷണി വന്നതിനെ തുടര്‍ന്ന് 200ഓളം സിസിടിവി കാമറകള്‍ പോലിസ് പരിശോധിക്കുകയും ഹോട്ടലുകള്‍ റെയ്ഡ് ചെയ്യുകയും ചെയ്തിരുന്നു. നിരവധി തവണ ഫോണ്‍കോളുകളിലൂടേയും കത്തുകളിലൂടേയും ഇയാള്‍ പലരേയും ഭീഷണിപ്പെടുത്തിയിട്ടുണ്ട്. മുന്‍ മധ്യപ്രദേശ് മുഖ്യമന്ത്രി കമല്‍നാഥ് പങ്കെടുത്ത പരിപാടിയിലും പ്രതിയെത്തിയിരുന്നുവെന്ന് പോലിസ് പറഞ്ഞു.