ഇടുക്കിയില്‍ യുവതിയുടെ മൃതദേഹം വീട്ടിലെ കട്ടിലിനടിയില്‍ പുതപ്പ് കൊണ്ട് മൂടിയ നിലയില്‍
ഏതാനും ദിവസത്തെ പഴക്കം മൃതദേഹത്തിനുണ്ട്.
ഇടുക്കി: യുവതിയുടെ മൃതദേഹം വീട്ടിലെ കട്ടിലിനടിയില്‍ കമ്പിളി പുതപ്പിട്ട് മൂടിയനിലയില്‍ കണ്ടെത്തി. കാഞ്ചിയാറില്‍ പേഴുംകണ്ടം വട്ടമുകളേല്‍ ബിജേഷിന്റെ ഭാര്യ പി ജെ വത്സമ്മ എന്ന അനുമോളെയാണ് മരിച്ചനിലയില്‍ കണ്ടെത്തിയത്. യുവതിയുടെ ഭര്‍ത്താവ് ബിജേഷ് ഒളിവിലാണ്. കുറച്ച് ദിവസങ്ങളായി വത്സമ്മയെ കാണാനില്ലായിരുന്നു. തുടര്‍ന്ന് ബന്ധുക്കള്‍ അന്വേഷിച്ച് വീട്ടിലെത്തി. വീട് പൂട്ടിയ നിലയിലായിരുന്നു. കതക് തകര്‍ത്ത് ബന്ധുക്കള്‍ അകത്ത് കയറി നടത്തിയ പരിശോധനയില്‍ കിടപ്പുമുറിയിലെ കട്ടിലിനടിയില്‍ പൊതിഞ്ഞ നിലയില്‍ മൃതദേഹം കണ്ടെത്തുകയായിരുന്നു. ഏതാനും ദിവസത്തെ പഴക്കം മൃതദേഹത്തിനുണ്ട്. ഭര്‍ത്താവ് ബിജേഷിനായി കട്ടപ്പന പൊലീസ് അന്വേഷണം ആരംഭിച്ചിട്ടുണ്ട്. വത്സമ്മയുട മൃതദേഹം ഇന്‍ക്വസ്റ്റ് നടപടികള്‍ പൂര്‍ത്തിയാക്കി പോസ്റ്റ്‌മോര്‍ട്ടത്തിനായി ആശുപത്രിയിലേക്ക് മാറ്റി.