തിരുവനന്തപുരം: റോഡരികില്‍ സ്ത്രീയെ വെട്ടിക്കൊലപ്പെടുത്തിയ കേസിലെ പ്രതി ജയിലിനുള്ളില്‍ ജീവനൊടുക്കി. പേരൂര്‍ക്കട വഴയിലയില്‍ സിന്ധുവിനെ കൊലപ്പെടുത്തിയ കേസിലെ പ്രതി നന്ദിയോട് സ്വദേശി രാജേഷാണ് പൂജപ്പുര ജില്ലാ ജയിലിലെ സെല്ലിനുള്ളില്‍ തൂങ്ങി മരിച്ചത്. പൂജപ്പുര ജില്ലാ ജയിലിലെ ശുചിമുറിയിലാണ് ഇന്ന് പുലര്‍ച്ചെ രാജേഷിനെ മരിച്ച നിലയില്‍ കണ്ടെത്തിയത്. കൈലിയില്‍ കെട്ടിത്തൂങ്ങിയ നിലയിലായിരുന്നു മൃതദേഹം. സിന്ധുവും രാജേഷും 12 വര്‍ഷമായി ഒരുമിച്ചുകഴിയുകയായിരുന്നു.
എന്നാല്‍, കഴിഞ്ഞ ഒരുമാസമായി ഇരുവരും അകല്‍ച്ചയിലായിരുന്നു. വ്യാഴാഴ്ച രാവിലെ 9.30 ഓടെ വഴയിലയിലെ തിരക്കുള്ള റോഡരികില്‍ വച്ചാണ് രാജേഷ്, സിന്ധുവിനെ ആക്രമിച്ചത്. കഴുത്തിനും തലയ്ക്കും വെട്ടേറ്റ സിന്ധുവിനെ പോലിസുകാരും നാട്ടുകാരും ചേര്‍ന്ന് മെഡിക്കല്‍ കോളജ് ആശുപത്രിയിലെത്തിച്ചെങ്കിലും ജീവന്‍ രക്ഷിക്കാനായില്ല. കിളിമാനൂരില്‍ ജ്യൂസ് കട നടത്തുകയായിരുന്നു രാജേഷ്. സിന്ധു അകന്നുമാറുന്നുവെന്ന സംശയത്തെത്തുടര്‍ന്നാണ് കൊലപാതകം നടത്തിയതെന്നാണ് പ്രതി പോലിസിനോട് പറഞ്ഞത്.