മാഡ്രിഡ്: സ്പാനിഷ് ലീഗില്‍ ബാഴ്‌സയ്ക്ക് വമ്പന്‍ തിരിച്ചടി. രണ്ടാം സ്ഥാനത്തുള്ള റയല്‍ മാഡ്രിഡ് ഒന്നിലേക്ക് കുതിച്ചതാണ് ബാഴ്‌സയക്ക് വിനയായത്. ഇന്ന് റയല്‍ സോസിഡാഡിനെതിരേ 2-1 ജയം നേടിയതോടെ റയല്‍ ഒന്നാം സ്ഥാനം തിരിച്ചുപിടിച്ചു. സെര്‍ജിയോ റാമോസ്(50), കരീം ബെന്‍സിമ(70) എന്നിവരാണ് റയലിനായി ഗോള്‍ നേടിയത്. ഇരു ടീമിനും 65 പോയിന്റാണുള്ളത്. ഗോള്‍ ശരാശരിയിലാണ് റയല്‍ ഒന്നിലെത്തിയത്. മറ്റ് മല്‍സരങ്ങളില്‍ സെല്‍റ്റാ വിഗോ ആല്‍വ്‌സിനെ എതിരില്ലാത്ത ആറ് ഗോളിന് തോല്‍പ്പിച്ചു. വലന്‍സിയ ഒസാസുനയെ എതിരില്ലാത്ത രണ്ട് ഗോളിനും തോല്‍പ്പിച്ചു.
ഇംഗ്ലിഷ് പ്രീമിയര്‍ ലീഗില്‍ ലിവര്‍പൂളിന് സമനില. എവര്‍ട്ടണ്‍ ആണ് ലിവര്‍പൂളിനെ ഗോള്‍ രഹിത സമനിലയില്‍ കുടുക്കിയത്. ഇറ്റാലിയന്‍ സീരി എയില്‍ സംമ്പഡോറിയയെ ഇന്റര്‍മിലാന്‍ 2-1ന് തോല്‍പ്പിച്ചു.