പത്തനംതിട്ട: കോന്നി എലിയറക്കലില്‍ ബാലിക സദനത്തില്‍ വിദ്യാര്‍ഥിനിയെ തൂങ്ങി മരിച്ച നിലയില്‍ കണ്ടെത്തി. ചിറ്റാര്‍ സ്വദേശിയായ സൂര്യയാണ് (15) മരിച്ചത്.
ഇന്ന് പുലര്‍ച്ചെ അഞ്ച് മണിക്കായിരുന്നു സംഭവം. ബാലിക സദനത്തിന്റെ മുകളിലെത്തെ നിലയിലാണ് മൃതദേഹം കണ്ടെത്തിയത്. അമ്മ മരണപ്പെട്ടതിനെ തുടര്‍ന്ന് നോക്കാന്‍ ആളില്ലാത്തതിനാല്‍ കുട്ടിയെ സിഡബ്‌ള്യുസി ബാലികാ സദനത്തിലാക്കുകയായിരുന്നു.
പത്ത് വര്‍ഷമായി ഇവിടെ താമസിച്ചാണ് പഠനം. സ്‌കൂള്‍ തുറക്കുന്നതിന് മുന്നോടിയായി അച്ഛനടക്കമുള്ള ബന്ധുക്കളെ കാണാനായി സൂര്യ ചിറ്റാറിലുള്ള വീട്ടിലേക്ക് പോയിരുന്നു. മടങ്ങി വന്ന ശേഷം സൂര്യയെ ദുഃഖിതയായി കണ്ടുവെന്നും ഭക്ഷണം കഴിക്കുന്നതിനടക്കം വിമുഖത കാണിച്ചിരുന്നുവെന്നും ഒപ്പമുള്ള കുട്ടികള്‍ പറഞ്ഞു. തുടര്‍ന്ന് ബാലിക സദനം അധികൃതര്‍ സൂര്യക്ക് കൗണ്‍സിലിങ് നല്‍കിയിരുന്നു.