തിരുവനന്തപുരം: കണ്‍ട്രോള്‍ റൂമില്‍ വിളിച്ച് മുഖ്യമന്ത്രി പിണറായി വിജയനെ ആക്രമിക്കുമെന്ന് ഭീഷണി മുഴക്കിയ ആള്‍ പിടിയിലായി. ചാരാച്ചിറ സ്വദേശിയായ ബാലു (51) ആണ് പിടിയിലായത്. മുഖ്യമന്ത്രിയുടെ സുരക്ഷ ശക്തമാക്കുന്നതിന്റെ ഭാഗമായി ക്ലിഫ് ഹൗസ് റോഡ്, നന്തന്‍കോട് എന്നിവിടങ്ങളില്‍ പോലിസ് വാഹനങ്ങള്‍ തടഞ്ഞതിന്റെ പേരിലായിരുന്നു ഭീഷണി. വ്യാഴാഴ്ച രാത്രി 11.30 ഓടെയാണ് ഇയാള്‍ പോലിസ് കണ്‍ട്രോള്‍ റൂമിലേയ്ക്ക് വിളിച്ചത്.
സൈബര്‍ പോലിസിന്റെ സഹായത്തോടെയാണ് ഇയാളെ കണ്ടെത്തിയത്. മ്യൂസിയം സിഐ മഞ്ജുലാലിന്റെ നേതൃത്വത്തിലുള്ള സംഘം വെള്ളിയാഴ്ച രാവിലെയാണ് ഇയാളെ കസ്റ്റഡിയിലെടുത്ത്. പിന്നീട് സ്‌റ്റേഷന്‍ ജാമ്യത്തില്‍ വിട്ടയച്ചു. മദ്യലഹരിയില്‍ ഇയാള്‍ നേരത്തെ പലരെയും ഫോണില്‍ വിളിച്ച് ഭീഷണിപ്പെടുത്തിയിട്ടുണ്ടെന്നും പോലിസ് പറഞ്ഞു.