പാവറട്ടി: മണലൂര്‍ നിയോജകമണ്ഡലം യുഡിഎഫ് സ്ഥാനാര്‍ത്ഥി വിജയ് ഹരിയുടെ വിജയത്തിനായി മുന്നിട്ടിറങ്ങി മുന്‍ വിദ്യാഭ്യാസ വകുപ്പ് മന്ത്രിയും പാര്‍ലമെന്റംഗവുമായ ഇ ടി മുഹമ്മദ് ബഷീര്‍ എം പി. അദ്ദേഹത്തിന്റെ വരവിന്റെ പ്രത്യേകത എത്തിയത് പ്രസംഗിക്കാനല്ല എന്നതാണ്. പകരം കടകള്‍ കയറിയിറങ്ങി വോട്ടഭ്യര്‍ത്ഥിച്ചു.
'മിടുക്കനായ സ്ഥാനാര്‍ത്ഥിയാണ്. എനിക്ക് നേരിട്ടറിയുന്ന ചെറുപ്പക്കാരനാണ്. നിങ്ങളുടെ നാടിന് ഗുണമുണ്ടാവും. സഹായിക്കണം. കൈപ്പത്തിക്ക് വോട്ട് നല്‍കണം. അതിനായി വന്നതാണ്'- പാവറട്ടി ടൗണിലെ സ്ഥാനാര്‍ത്ഥിയോടൊപ്പം കടകളില്‍ കയറി ഇ ടി അഭ്യര്‍ത്ഥിച്ചു.
വോട്ടഭ്യര്‍ത്ഥന പൂര്‍ത്തിയാക്കിയ ശേഷം പ്രവര്‍ത്തകരോടായി ഇ ടി യുടെ വക ഉപദേശവും: 'ഓരോ വോട്ടും ഉറപ്പാക്കണം. ജനങ്ങള്‍ യുഡിഎഫിന് വോട്ട് ചെയ്യാനാണ് തീരുമാനിച്ചിട്ടുള്ളത്. നമ്മുടെ അലംഭാവം കൊണ്ട് ഭൂരിപക്ഷം കുറയരുത്'.
ജില്ലാ പഞ്ചായത്തംഗം വി എം മുഹമ്മദ് ഗസ്സാലി, ബ്ലോക്ക് പഞ്ചായത്തംഗം ഷാജന്‍ മാസ്റ്റര്‍, എ ടി സ്റ്റീഫന്‍ മാസ്റ്റര്‍, എന്‍ എ അബ്ദുറഹിമാന്‍ എന്നിവര്‍ അനുഗമിച്ചു.