ബിജെപി സ്ഥാനാര്‍ഥി ഹേമമാലിനിയുടെ ആസ്തി 101 കോടി; അഞ്ച് വര്‍ഷത്തെ വര്‍ധന 35 കോടി
മധുര ലോക്‌സഭാ സീറ്റിലേക്കാണ് ഹേമ മാലിനി മത്സരിക്കുന്നത്. മണ്ഡലത്തിലെ സിറ്റിങ് എംപിയാണ് ഹേമ മാലിനി.
മധുര: ലോക്‌സഭാ തിരഞ്ഞെടുപ്പില്‍ ബിജെപിക്കു വേണ്ടി മല്‍സരിക്കുന്ന മുന്‍ സിനിമാ നടി ഹേമമാലിനിയുടെ ആസ്തി 101 കോടി രൂപ. മധുര ലോക്‌സഭാ സീറ്റിലേക്കാണ് ഹേമ മാലിനി മത്സരിക്കുന്നത്. മണ്ഡലത്തിലെ സിറ്റിങ് എംപിയാണ് ഹേമ മാലിനി. തിരഞ്ഞെടുപ്പ് കമ്മീഷന് നല്‍കിയ സത്യവാങ്മൂലപ്രകാരം കഴിഞ്ഞ അഞ്ചുവര്‍ഷത്തിനിടെ ആസ്തിയില്‍ 34.6 കോടിയുടെ വര്‍ധനവാണ് ഉണ്ടായിരിക്കുന്നത്.
2014ലെ തിരഞ്ഞെടുപ്പ് കാലത്ത് നല്‍കിയ സത്യവാങ്മൂലത്തില്‍ നടിയുടെ ആസ്തിയായി കാണിച്ചിരിക്കുന്നത് 66 കോടി രൂപയാണ്. പുതിയ സത്യവാങ്മൂലത്തില്‍ ഇവരുടെ ഭര്‍ത്താവും നടനുമായ ധര്‍മേന്ദ്രസിങ് ദിയോളിന്റെ ആസ്തിയിലും വര്‍ധനവ് ഉണ്ടായിട്ടുണ്ട്. 12.30 കോടി രൂപ വര്‍ധിച്ച് 123.85 കോടിയാണ് ധര്‍മേന്ദ്രസിങ്ങിന്റെ ആസ്തി. അതേസമയം ഹേമാമാലിനിക്ക് 6.75 കോടിയും ഭര്‍ത്താവ് ധര്‍മേന്ദ്ര സിങ്ങിന് 7.37 കോടിയും കടമുണ്ട്.