കണ്ണൂര്‍: തലശ്ശേരിയില്‍ സ്വകാര്യ വ്യക്തിയുടെ പറമ്പില്‍ കാട് വെട്ടിത്തെളിക്കുന്നതിനിടെ ബോംബ് പൊട്ടിത്തെറിച്ച് ഒരാള്‍ക്ക് പരിക്ക്. കോഴിക്കോട് സ്വദേശി മനോജ് എന്ന തൊഴിലാളിക്കാണ് പരിക്കേറ്റത്. പോലിസും ബോംബ് സ്‌ക്വാഡും സ്ഥലത്ത് പരിശോധന നടത്തി.
രാവിലെയാണ് തലശ്ശേരി ഇടത്തിലമ്പലത്ത് സ്‌ഫോടനമുണ്ടായത്. സ്വകാര്യ വ്യക്തിയുടെ പറമ്പില്‍ കാടുവെട്ടിത്തെളിക്കുന്നതിനിടെ ബോംബ് പൊട്ടിത്തെറിക്കുകയായിരുന്നു. ഒഴിഞ്ഞ പറമ്പില്‍സൂക്ഷിച്ച ബോംബാണ് പൊട്ടിത്തെറിച്ചത്. കാട് വെട്ടിത്തെളിക്കാന്‍ ഉപയോഗിക്കുന്ന യന്ത്രം പ്രവര്‍ത്തിപ്പിക്കുന്നതിനിടെയാണ് സ്‌ഫോടനമുണ്ടായത്.
സ്റ്റീല്‍ ബോംബാണ് പൊട്ടിത്തെറിച്ചതെന്ന് പോലിസ് പറഞ്ഞു. മനോജിന്റെ രണ്ട് കൈകള്‍ക്കും പരിക്കേറ്റു. തലശ്ശേരി താലൂക്ക് ആശുപത്രിയില്‍ എത്തിച്ച് പ്രാഥമിക ചികില്‍സ നല്‍കിയ ശേഷം ഇയാളെ കോഴിക്കോട് മെഡിക്കല്‍ കോളജിലേക്ക് മാറ്റി. സംഭവത്തെ കുറിച്ച് വിശദമായ അന്വേഷണം നടത്തുമെന്ന് പോലിസ് അറിയിച്ചു.