തിരുവനന്തപുരം: കണ്ണൂര്‍ വിമാനത്താവള കമ്പനിയായകിയാല്‍ സിപിഎമ്മിന് നിയമവിരുദ്ധ സഹായങ്ങള്‍ നല്‍കിയെന്നും ഇത് മറച്ചുവയ്ക്കാനാണ് കിയാലില്‍ ഓഡിറ്റിങ് നടത്തേണ്ടന്ന നിലപാട് സര്‍ക്കാര്‍ സ്വീകരിച്ചതെന്നും പ്രതിപക്ഷ നേതാവ് രമേശ് ചെന്നിത്തല. തിരുവനന്തപുരത്ത് നടത്തിയ വാര്‍ത്താസമ്മേളനത്തില്‍ സംസാരിക്കുകയായിരുന്നു അദ്ദേഹം. 2015ല്‍ തിരഞ്ഞെടുപ്പ് പ്രഖ്യാപനം വന്ന ശേഷം സ്ഥലം എംഎല്‍എയായ ഇ പി ജയരാജന്റെ തിരഞ്ഞെടുപ്പ് പ്രവര്‍ത്തനങ്ങള്‍ക്കും പിണറായി വിജയന്‍ നടത്തിയ നവകേരള യാത്രയുടെ പരസ്യത്തിനും കിയാല്‍ എംഡി സിപിഎം മുഖപത്രമായ ദേശാഭിമാനിക്കു പണം നല്‍കിയിട്ടുണ്ട്. എല്‍ഡിഎഫ് സര്‍ക്കാരിന്റെ സത്യപ്രതിജ്ഞാച്ചടങ്ങിനും കിയാല്‍ പരസ്യം നല്‍കിയിട്ടുണ്ടെന്നാണു റിപോര്‍ട്ട്. ഇതെല്ലാം മറച്ചുവയ്ക്കാനാണ് ഓഡിറ്റിങ് നടത്താത്തതെന്നും ചെന്നിത്തല പറഞ്ഞു.