പാലക്കാട്: ചെര്‍പ്പുളശ്ശേരിയില്‍ സിപിഎം ഓഫിസില്‍ യുവതി പീഡനത്തിനിരയായി എന്ന കേസില്‍ പ്രതി അറസ്റ്റില്‍. ചെര്‍പ്പുളശേരി പുത്തനാലയ്ക്കല്‍ തട്ടാരുതൊടിയില്‍ പി പ്രകാശനാണ് അറസ്റ്റിലായത്. ബിരുദ പഠനകാലത്താണു യുവതി യുവാവുമായി അടുപ്പത്തിലാവുന്നത്. കഴിഞ്ഞ വര്‍ഷം ജൂണില്‍ കോളജ് മാഗസിന്‍ തയാറാക്കുന്നതിനായി ഇരുവരും ചെര്‍പ്പുളേശ്ശരിയിലെ പാര്‍ട്ടി ഓഫിസില്‍ പോയപ്പോള്‍ യുവാവ് പീഡിപ്പിച്ചതിനെ തുടര്‍ന്ന് ഗര്‍ഭിണിയായ യുവതി ഗര്‍ഭിണിയായെന്നും ഈ മാസം 16നു പ്രസവിച്ചെന്നുമാണ് എഫ്‌ഐആര്‍. അതേസമയം യുവാവിനു പാര്‍ട്ടിയുമായി ബന്ധമില്ലെന്നും കോളജില്‍ പഠിച്ചിട്ടില്ലെന്നുമാണ് സിപിഎം വാദം. ഇക്കഴിഞ്ഞ പതിനാറിന് മണ്ണൂര്‍ നഗരിപ്പുറത്ത് നവജാതശിശുവിനെ ഉപേക്ഷിച്ച നിലയില്‍ കണ്ടതിനെ തുടര്‍ന്നാണു സംഭവങ്ങളുടെ തുടക്കം. തുടര്‍ന്നുള്ള അന്വേഷണത്തിലാണ്് കുഞ്ഞിന്റെ അമ്മയെ കണ്ടെത്തുന്നതും പീഡനത്തിനിരയായെന്നു യുവതി മൊഴി നല്‍കുന്നതും.