കോട്ടയം ജില്ലയില്‍ 25 പേര്‍ക്ക് കൊവിഡ്; 22ഉം സമ്പര്‍ക്കത്തിലൂടെ, ചികില്‍സയിലുള്ളത് 178 പേര്‍
സമ്പര്‍ക്കം മുഖേന രോഗബാധിതരായവരില്‍ 15 പേര്‍ പാറത്തോട് ഗ്രാമപ്പഞ്ചായത്തില്‍നിന്നുള്ളവരാണ്. രണ്ടുപേര്‍ വിദേശത്തുനിന്നും ഒരാള്‍ ബംഗളൂരുവില്‍നിന്നും എത്തിയതാണ്.
കോട്ടയം: ജില്ലയില്‍ 25 പേര്‍ക്ക് കൂടി കൊവിഡ് സ്ഥിരീകരിച്ചു. ഇതില്‍ 22 പേര്‍ക്കും സമ്പര്‍ക്കം മുഖേനയാണ് രോഗം ബാധിച്ചത്. സമ്പര്‍ക്കം മുഖേന രോഗബാധിതരായവരില്‍ 15 പേര്‍ പാറത്തോട് ഗ്രാമപ്പഞ്ചായത്തില്‍നിന്നുള്ളവരാണ്. രണ്ടുപേര്‍ വിദേശത്തുനിന്നും ഒരാള്‍ ബംഗളൂരുവില്‍നിന്നും എത്തിയതാണ്. നേരത്തെ രോഗം സ്ഥിരീകരിച്ച പാറത്തോട് സ്വദേശിയുടെ സമ്പര്‍ക്കപ്പട്ടികയില്‍ ഉള്‍പ്പെട്ട പാറത്തോട് പഞ്ചായത്ത് എട്ടാം വാര്‍ഡില്‍ താമസിക്കുന്ന 12 പേരും ഏഴാം വാര്‍ഡില്‍നിന്നുള്ള രണ്ടുപേരും ഒമ്പതാം വാര്‍ഡില്‍നിന്നുള്ള ഒരാളും രോഗബാധിതരില്‍ ഉള്‍പ്പെടുന്നു.
ഇദ്ദേഹത്തിന്റെതന്നെ സമ്പര്‍ക്ക പട്ടികയിലുള്ള വാഴൂര്‍ സ്വദേശി(19)യുടെയും സ്വകാര്യാശുപത്രി ജീവനക്കാരിയായ എരുമേലി സ്വദേശിനി(35)യുടെയും പരിശോധനാഫലം പോസിറ്റീവാണ്. കുമരകം സ്വദേശിയായ 48 കാരന്റെയും എഴുമാന്തുരുത്ത് സ്വദേശിയായ മൂന്നുവയസുള്ള കുട്ടിയുടെയും സമ്പര്‍ക്ക പശ്ചാത്തലം വ്യക്തമല്ല. നേരത്തെ രോഗം സ്ഥീരീകരിച്ച വെച്ചൂര്‍ സ്വദേശിനിയുടെ മകള്‍ക്കും (12) രോഗബാധിതയായി ചികില്‍സയില്‍ കഴിയുന്ന എഴുമാന്തുരുത്ത് സ്വദേശിനിയുമായി സമ്പര്‍ക്കം പുലര്‍ത്തിയ 75കാരിക്കും നേരത്തെ രോഗം സ്ഥിരീകരിച്ച പൈക സ്വദേശിയുടെ സമ്പര്‍ക്ക പട്ടികയിലുണ്ടായിരുന്ന കാഞ്ഞിരപ്പള്ളി സ്വദേശിക്കും(28) വൈറസ് ബാധ സ്ഥിരീകരിച്ചു.
ഖത്തറില്‍നിന്ന് ജൂണ്‍ 28ന് എത്തി ഹോം ക്വാറന്റൈനില്‍ കഴിഞ്ഞിരുന്ന തൃക്കൊടിത്താനം സ്വദേശി(46), ബംഗളൂരുവില്‍നിന്ന് ജൂലൈ ഒന്നിന് കാറിലെത്തി ഹോം ക്വാറന്റയിനില്‍ കഴിഞ്ഞിരുന്ന മുണ്ടക്കയം സ്വദേശിയായ ആണ്‍കുട്ടി(14), ദുബയില്‍നിന്ന് ജൂലൈ ഒന്നിന് എത്തി തൊടുപുഴയില്‍ ഹോം ക്വാറന്റൈനില്‍ കഴിഞ്ഞിരുന്ന പൂവക്കുളം സ്വദേശി(30) എന്നിവരാണ് രോഗം സ്ഥിരീകരിച്ച മറ്റുള്ളവര്‍. ജില്ലയില്‍ കൊവിഡ് ബാധിച്ച് ചികില്‍സയിലായിരുന്ന ഒമ്പതുപേര്‍ക്ക് രോഗം ഭേദമായി.
ജൂണ്‍ 19ന് രോഗം സ്ഥിരീകരിച്ച മാടപ്പള്ളി സ്വദേശി(50), ജൂണ്‍ 22ന് രോഗം സ്ഥിരീകരിച്ച രാമപുരം സ്വദേശിനി(53), ജൂണ്‍ 24ന് രോഗം സ്ഥിരീകരിച്ച പള്ളിക്കത്തോട് സ്വദേശി(70), ജൂണ്‍ 26ന് രോഗം സ്ഥിരീകരിച്ച കുറിച്ചി സ്വദേശി(23), പള്ളിക്കത്തോട് സ്വദേശി(32), ജൂലൈ രണ്ടിന് രോഗം സ്ഥിരീകരിച്ച കൂരോപ്പട സ്വദേശി(60), വാഴൂര്‍ സ്വദേശി(31), കോട്ടയം സ്വദേശി(48), ജൂലൈ മൂന്നിന് രോഗം സ്ഥിരീകരിച്ച കങ്ങഴ സ്വദേശി(39) എന്നിവരാണ് രോഗമുക്തരായത്. ഇതിനു പുറമെ പത്തനംതിട്ട, ഇടുക്കി ജില്ലകളില്‍നിന്നുള്ള നാലു പേരും കോട്ടയം ജില്ലയിലെ ചികില്‍സാകേന്ദ്രങ്ങളില്‍നിന്ന് രോഗമുക്തരായി വീടുകളിലേക്ക് മടങ്ങി.
കോട്ടയം ജില്ലയില്‍ ഇതുവരെ 387 പേര്‍ക്ക് കൊവിഡ് ബാധിച്ചു. 209 പേര്‍ രോഗമുക്തരായി. നിലവില്‍ ജില്ലക്കാരായ 178 പേര്‍ ചികില്‍സയിലുണ്ട്. ഇതില്‍ നാലുപേര്‍ മറ്റു ജില്ലകളിലാണ്. മുട്ടമ്പലം ഗവണ്‍മെന്റ് വര്‍ക്കിങ് വിമന്‍സ് ഹോസ്റ്റലിലെ പ്രാഥമിക ചികില്‍സാ കേന്ദ്രം-42, കോട്ടയം ജനറല്‍ ആശുപത്രി-44, അകലക്കുന്നം പ്രാഥിക ചികില്‍സാ കേന്ദ്രം-34, പാലാ ജനറല്‍ ആശുപത്രി- 28, കോട്ടയം മെഡിക്കല്‍ കോളജ് ആശുപത്രി -26, എറണാകുളം മെഡിക്കല്‍ കോളേജ് ആശുപത്രി-2, മഞ്ചേരി മെഡിക്കല്‍ കോളജ് ആശുപത്രി-1, ഇടുക്കി മെഡിക്കല്‍ കോളജ്-1.