കൊവിഡ്: പോലിസുദ്യോഗസ്ഥര്‍ക്ക് നിരീക്ഷണത്തില്‍ പോകാന്‍ എറണാകുളത്ത് കേന്ദ്രം ഒരുങ്ങി
കാരാട്ടുപള്ളിക്കര ഭാഗത്തെ നഗരസഭ കെട്ടിടമാണ് ഇതിനായ് സജ്ജീകരിച്ചിരിക്കുന്നത്. നിലവില്‍ അഞ്ച് പോലിസുദ്യോഗസ്ഥരാണ് ഇവിടെ നിരീക്ഷണത്തില്‍ കഴിയുന്നത്
കൊച്ചി: കൊവിഡ് ബാധിതരുമായി സമ്പര്‍ക്കത്തിലേര്‍പ്പെട്ട എറണാകുളം റൂറല്‍ ജില്ലയിലെ പോലിസുദ്യോഗസ്ഥര്‍ക്ക് നിരീക്ഷണത്തില്‍ താമസിക്കുവാന്‍ പെരുമ്പാവൂരില്‍ കേന്ദ്രമൊരുങ്ങി. കാരാട്ടുപള്ളിക്കര ഭാഗത്തെ നഗരസഭ കെട്ടിടമാണ് ഇതിനായ് സജ്ജീകരിച്ചിരിക്കുന്നത്. നിലവില്‍ അഞ്ച് പോലിസുദ്യോഗസ്ഥരാണ് ഇവിടെ നിരീക്ഷണത്തില്‍ കഴിയുന്നത്. ഇവര്‍ക്കുള്ള ഭക്ഷണവും, കുടിവെള്ളവും കളമശേരിയിലെ എ ആര്‍ ക്യാംപില്‍ നിന്നും എത്തിച്ചു കൊടുക്കുകയാണ് ചെയ്യുന്നത് ആരോഗ്യവസ്ഥ കൃത്യമായി പരിശോധിക്കാനുള്ള സംവിധാനവും ഏര്‍പ്പെടുത്തിയിട്ടുണ്ട്. വീടുകളില്‍ സൗകര്യമില്ലാത്ത പോലിസുദ്യോഗസ്ഥര്‍ക്കാണ് ഇവിടെ നിരീക്ഷണത്തില്‍ കഴിയുന്നതിന് മുന്‍ഗണന നല്‍കികിയിട്ടുള്ളത്. പോലിസുദ്യോഗസ്ഥര്‍ കൂടുതലായി നിരീക്ഷണത്തില്‍ പോകുന്ന സാഹചര്യത്തിലാണ് പ്രത്യേക താമസ സൗകര്യം ഒരുക്കുന്നതെന്ന് എറണാകുളം റൂറല്‍ ജില്ലാ പോലിസ് മേധാവി കെ കാര്‍ത്തിക് പറഞ്ഞു.