കനോലി കനാലിന്റെ തീരത്തുള്ള വി കെ രാജന്‍ മെമ്മോറിയല്‍ പാര്‍ക്ക് 35 ലക്ഷം രൂപ ചെലവഴിച്ച് വിവിധ നവീകരണ പ്രവര്‍ത്തനങ്ങള്‍ നടത്തിയാണ് പുനര്‍നിര്‍മ്മിച്ച് പൊതുജനങ്ങള്‍ക്കായി തുറന്നു കൊടുത്തത്. നഗരസഭയുടെ 72 സെന്റ് സ്ഥലത്ത് 2003 ഒക്ടോബര്‍ അഞ്ചിന് ഉദ്ഘാടനം കഴിഞ്ഞ പാര്‍ക്ക് 2013ല്‍ വി.കെ രാജന്‍ സ്മാരക പാര്‍ക്ക് ആയി നാമകരണം ചെയ്തു. മുന്‍ മുഖ്യമന്ത്രി പി കെ വാസുദേവന്‍ നായരാണ് പാര്‍ക്കിന്റെ ഉദ്ഘാടനം നിര്‍വ്വഹിച്ചത്. 2018ലെ പ്രളയത്തില്‍ പാര്‍ക്കിലെ കെട്ടിടം ഉള്‍പ്പെടെ ഭാഗികമായി നശിച്ചു. തുടര്‍ന്ന് പാര്‍ക്കില്‍ സന്ദര്‍ശകരില്ലാതായതോടെ പ്രവര്‍ത്തനം നിലച്ചു. പാര്‍ക്ക് പുനര്‍നിര്‍മ്മിക്കണമെന്ന ആവശ്യം ശക്തമായതോടെനഗരസഭ പ്ലാന്‍ ഫണ്ടില്‍ നിന്ന് 10 ലക്ഷം രൂപ വിനിയോഗിച്ച് ഫ്‌ളോര്‍ടൈല്‍, ലാന്റ് സ്‌കേപിങ്ങ് തുടങ്ങിയ പ്രവൃത്തികള്‍ ആദ്യഘട്ടമെന്ന നിലയില്‍ നടത്തി. തുടര്‍ന്ന് അഡ്വ വി ആര്‍ സുനില്‍ കുമാര്‍ എംഎല്‍എയുടെ ആസ്തി വികസന ഫണ്ടില്‍ നിന്ന് കുട്ടികള്‍ക്ക് കളിയുപകരണങ്ങള്‍ വാങ്ങാന്‍ 25 ലക്ഷം രൂപ അനുവദിച്ചു. ഇതോടെ ആകര്‍ഷണീയമായ വിധത്തില്‍ വി കെ രാജന്‍ മെമ്മോറിയല്‍ പാര്‍ക്ക് പുനഃസ്ഥാപിച്ചു.