കോതമുക്കില്‍ സിപിഐ പ്രവര്‍ത്തകന് നേരേ വധശ്രമം; ആക്രമണത്തിന് പിന്നില്‍ സിപിഎമ്മെന്ന് ആരോപണം
പൊന്നാനി: വെളിയംകോട് പഞ്ചായത്തിലെ കോതമുക്കില്‍ സിപിഐ പ്രവര്‍ത്തകനുനേരേ വധശ്രമം. ഗുരുതര പരിക്കുകളോടെ ഒരാളെ ആശുപത്രിയില്‍ പ്രവേശിപ്പിച്ചു. സിപിഐ നേതാവ് ബാലന്‍ ചെറോമലിനു നേരെയാണ് വധശ്രമമുണ്ടായത്. ഇയാളെ തലയ്ക്ക് ഗുരുതരമായ പരിക്കുകളോടെ ആശുപത്രിയില്‍ പ്രവേശിപ്പിച്ചു. കൊടിത്തോരണങ്ങള്‍ സ്ഥാപിച്ചതും അഴിച്ചെടുത്തതുമായ തര്‍ക്കങ്ങളാണ് സംഘര്‍ഷത്തിന്ന് കാരണമായി പറയപ്പെടുന്നത്.
പരിക്കേറ്റ ബാലനെ വിദഗ്ധചികില്‍സയ്ക്കായി കുന്ദംകുളം റോയല്‍ ആശുപത്രിയിലേക്ക് മാറ്റി. പൊന്നാനി മണ്ഡലത്തില്‍ സിപിഐ- സിപിഎം ഭിന്നത രൂക്ഷമായി തുടരുകയാണ്. ഇതിന്റെ പേരില്‍ സീറ്റ് ചര്‍ച്ചകള്‍ പോലും വഴിമുട്ടിനില്‍ക്കുകയാണ്. അതിനിടയിലാണ് അക്രമണമുണ്ടായത്. സിപിഎം- പ്രവര്‍ത്തകരാണ് അക്രമത്തിന് പിന്നിലെന്ന് സിപിഐ നേതാക്കള്‍ ആരോപിച്ചു.