ജിദ്ദ: ഉംറ നിര്‍വഹിക്കാനായി മക്കയിലെത്തിയ തീര്‍ഥാടകന്‍ റോഡ് മുറിച്ചു കടക്കുന്നതിനിടെ വാഹനമിടിച്ചു മരിച്ചു. കോഴിക്കോട് മുക്കം കൊടിയത്തൂര്‍ കാരകുറ്റി സ്വദേശി അരീപറ്റമണ്ണില്‍ ഉണ്ണി മാമു (76) ആണ് മരിച്ചത്. ഗുരുതര പരിക്കേറ്റ ഇദ്ദേഹത്തിന്റെ ഭാര്യ പാത്തുമ്മയെ മക്ക അല്‍നൂര്‍ ആശുപത്രിയില്‍ പ്രവേശിപ്പിച്ചു. കഴിഞ്ഞ മാസം 25ന് നാട്ടില്‍ നിന്നെത്തിയ ഉംറ സംഘം വെള്ളിയാഴ്ച ജുമുഅക്കു ശേഷം മദീനയിലേക്ക് പോകാനുള്ള ഒരുക്കത്തിലായിരുന്നു. ഉംറ ഗ്രൂപ്പിലെ മറ്റംഗങ്ങളോടൊപ്പം സൗര്‍ മല കാണുന്നതിനായി പോവുന്നതിനിടെയായിരുന്നു അപകടം. ഖബറടക്കം മക്കയില്‍ നടത്തുമെന്നു ബന്ധുക്കള്‍ അറിയിച്ചു. മക്കള്‍: അഷ്‌റഫ്(അധ്യാപകന്‍, കൊണ്ടോട്ടി പുത്തൂര്‍ പള്ളിക്കല്‍ സ്‌കൂള്‍), സാജിത, ഷെമീദ.