'പോസ്റ്റര്‍ ഒട്ടിച്ചവന്റെ വീട്ടുമുറ്റത്ത് ഇന്നോവ തിരിയും'; ജയരാജനെ ട്രോളി ബല്‍റാം
സമൂഹമാധ്യമങ്ങളില്‍ വൈറലായ ഒരു ചിത്രം പങ്കുവച്ചാണ് ബല്‍റാമിന്റെ ട്രോള്‍. വടകരയിലെ എല്‍ഡിഎഫ് സ്ഥാനാര്‍ഥി പി ജയരാജന്റെ തിരഞ്ഞെടുപ്പ് പ്രചാരണത്തിനായി മതിലില്‍ പതിപ്പിച്ച പോസ്റ്ററാണു ബല്‍റാമിന്റെ ട്രോളിനാധാരം.
കോഴിക്കോട്: വടകരയിലെ എല്‍ഡിഎഫ് സ്ഥാനാര്‍ഥി പി ജയരാജനെ ട്രോളി വി ടി ബല്‍റാം എംഎല്‍എ. സമൂഹമാധ്യമങ്ങളില്‍ വൈറലായ ഒരു ചിത്രം പങ്കുവച്ചാണ് ബല്‍റാമിന്റെ ട്രോള്‍. വടകരയിലെ എല്‍ഡിഎഫ് സ്ഥാനാര്‍ഥി പി ജയരാജന്റെ തിരഞ്ഞെടുപ്പ് പ്രചാരണത്തിനായി മതിലില്‍ പതിപ്പിച്ച പോസ്റ്ററാണു ബല്‍റാമിന്റെ ട്രോളിനാധാരം. ഇപ്പോള്‍ തിയറ്ററില്‍ പ്രദര്‍ശിപ്പിക്കുന്ന വാരിക്കുഴിയിലെ കൊലപാതകം എന്ന സിനിമാ പോസ്റ്ററിന് മുകളിലാണ് ജയരാജന്‍ ചിരിച്ചുകൊണ്ടിരിക്കുന്ന പോസ്റ്റര്‍ പതിച്ചത്.
സിനിമയുടെ പോസ്റ്ററിനു മുകളില്‍ ജയരാജനു വോട്ടഭ്യര്‍ഥിക്കുന്ന പോസ്റ്റര്‍ പതിപ്പിച്ചപ്പോള്‍ സിനിമയുടെ പേരില്ലാതായി. എന്നാല്‍, പോസ്റ്ററിലെ 'പൊട്ടിച്ചിരിയുടെ കൊലപാതകക്കഥ, ഫണ്‍ ഫാമിലി ത്രില്ലര്‍' എന്ന വരികള്‍ മറഞ്ഞില്ല. ഇത് പങ്കുവച്ചാണ് ബല്‍റാമിന്റെ ട്രോള്‍. പോസ്റ്റര്‍ ഒട്ടിച്ചവന്റെ വീട്ടുമുറ്റത്ത് ഇന്ന് രാത്രി ഇന്നോവ തിരിയുമെന്നായിരുന്നു ബല്‍റാം ഫെയ്‌സ്ബുക്കില്‍ നല്‍കിയ കുറിപ്പ്. വടകരയില്‍ പി ജയരാജന്‍ സിപിഎമ്മിനായി പോരാട്ടത്തിനിറങ്ങിയത് മുതല്‍ ബല്‍റാമും സജീവമായി രംഗത്തുണ്ട്. ബല്‍റാമിന്റെ ഫെയ്‌സ്ബുക്ക് പോസ്റ്റും ചിത്രവും ട്രോളര്‍മാരും ആഘോഷമാക്കിയിരിക്കുകയാണ്.