കോഴിക്കോട്: കൊവിഡ് മാര്‍ഗനിര്‍ദേശങ്ങള്‍ ലംഘിച്ചതിന് നടന്‍മാരായ മമ്മൂട്ടി, രമേശ് പിഷാരടി അടക്കമുള്ളവര്‍ക്കെതിരേ പോലിസ് കേസെടുത്തു. സ്വകാര്യാശുപത്രിയുടെ ചടങ്ങില്‍ പങ്കെടുത്തതിന്റെ പേരില്‍ ഏലത്തൂര്‍ പോലിസാണ് കേസെടുത്തത്. എപ്പിഡമിക് ഡിസീസസ് ആക്ട് പ്രകാരമാണ് കേസ്. രണ്ടുവര്‍ഷം തടവോ 10,000 രൂപ പിഴയോ കിട്ടാവുന്ന കുറ്റമാണിത്.
മമ്മൂട്ടിയെയും പിഷാരടിയെയും കൂടാതെ നിര്‍മാതാവ് ആന്റോ ജോസഫ്, ആശുപത്രി മാനേജ്‌മെന്റ് എന്നിവര്‍ക്കെതിരെയും പോലിസ് കേസെടുത്തിട്ടുണ്ട്. സുരക്ഷയിലുണ്ടായിരുന്ന പോലിസ് ഉദ്യോഗസ്ഥരുടെ റിപോര്‍ട്ടിന്റെ അടിസ്ഥാനത്തിലാണ് നടപടി. നടന്‍മാരെത്തിയപ്പോള്‍ മുന്നൂറോളം പേര്‍ കൂടിയിരുന്നതായും ഇവര്‍ക്കും ഉടന്‍ നോട്ടീസ് അയക്കുമെന്നും പ്രിന്‍സിപ്പല്‍ എസ്‌ഐ കെ ആര്‍ രാജേഷ് കുമാര്‍ പറഞ്ഞു.