കുവൈത്തില്‍ 559 പേര്‍ക്ക് കൊവിഡ്; മാസങ്ങള്‍ക്കുശേഷം മരണം റിപോര്‍ട്ട് ചെയ്യാത്ത ദിനം
337 സ്വദേശികള്‍ അടക്കം 559 പേര്‍ക്കാണ് ഇന്നു രോഗബാധ സ്ഥിരീകരിച്ചിരിക്കുന്നത്. ഇതടക്കം ഇന്നുവരെ ആകെ വൈറസ് ബാധയേറ്റവരുടെ എണ്ണം 59,763 ആയി.
കുവൈത്ത് സിറ്റി: കുവൈത്തില്‍ മാസങ്ങള്‍ക്കുശേഷം കൊവിഡ് രോഗത്തെത്തുടര്‍ന്നുള്ള ഒരൊറ്റ മരണം പോലും റിപോര്‍ട്ട് ചെയ്യപ്പെടാത്ത ദിനമായിരുന്നു ഇന്ന്. രാജ്യത്ത് കൊവിഡ് ബാധയെത്തുടര്‍ന്ന് ഇന്നലെ വരെ 408 പേരാണ് മരിച്ചത്. 337 സ്വദേശികള്‍ അടക്കം 559 പേര്‍ക്കാണ് ഇന്നു രോഗബാധ സ്ഥിരീകരിച്ചിരിക്കുന്നത്. ഇതടക്കം ഇന്നുവരെ ആകെ വൈറസ് ബാധയേറ്റവരുടെ എണ്ണം 59,763 ആയി.
രോഗബാധിതരായവരുടെ ആരോഗ്യമേഖല അടിസ്ഥാനമാക്കിയുള്ള കണക്ക് ഇപ്രകാരമാണ്. ഫര്‍വാനിയ- 144 അഹമ്മദി- 130, ഹവല്ലി- 76, കേപിറ്റല്‍- 45, ജഹറ- 164. 652 പേരാണ് ഇന്ന് രോഗമുക്തരായത്. ഇതോടെ ആകെ രോഗം സുഖമായവരുടെ എണ്ണം 50,339 ആയി. ആകെ 9,016 പേരാണ് ഇപ്പോള്‍ ചികില്‍സയില്‍ കഴിയുന്നത്. ഇവരില്‍ 138 പേര്‍ തീവ്രപരിചരണ വിഭാഗത്തില്‍ കഴിയുന്നവരുമാണ്.