ലോക ടെസ്റ്റ് ചാംപ്യന്‍ഷിപ്പ്; ഇന്ത്യ 217ന് പുറത്ത്
കൈല്‍ ജാമിസണ്‍ന്റെ അഞ്ച് വിക്കറ്റ് നേട്ടമാണ് ഇന്ത്യയുടെ നടുവൊടിച്ചത്.
സതാംപ്ടണ്‍: ലോക ടെസ്റ്റ് ചാംപ്യന്‍ഷിപ്പിന്റെ മൂന്നാം ദിനം ഇന്ത്യ 217ന് പുറത്ത്. ന്യൂസിലന്റ് താരം കൈല്‍ ജാമിസണ്‍ന്റെ അഞ്ച് വിക്കറ്റ് നേട്ടമാണ് ഇന്ത്യയുടെ നടുവൊടിച്ചത്. മൂന്നിന് 146 എന്ന നിലയില്‍ ഇന്ന് ബാറ്റിങ് ആരംഭിച്ച ഇന്ത്യക്ക് നിലയുറപ്പിക്കാനായില്ല. ക്യാപ്റ്റന് കോഹ്‌ലി(44) റണ്ണൊന്നും കൂട്ടിച്ചേര്‍ക്കാതെ ഇന്ന് ആദ്യം പുറത്തായി. ക്യാപ്റ്റന് ശേഷമെത്തിയ ഋഷഭ് പന്ത് നാല് റണ്‍സെടുത്ത് പുറത്താവുകയായിരുന്നു. ഇന്ത്യന്‍ നിരയില്‍ പിടിച്ചുനിന്ന രഹാനെയും 49 റണ്‍സെടുത്ത് പുറത്തായതോടെ ബ്ലൂസ് സമ്മര്‍ദ്ധത്തിലായി. രവീന്ദ്ര ജഡേജ(15), ആര്‍ അശ്വിന്‍ (22) എന്നിവര്‍ പൊരുതി നിന്നെങ്കിലും ബോള്‍ട്ടും ടിം സൗത്തിയും ഇരുവരെയും പുറത്താക്കി. രോഹിത്ത്, കോഹ്‌ലി, പന്ത്, ഇഷാന്ത് ശര്‍മ്മ, ബുംറ എന്നിവരുടെ വിക്കറ്റുകളാണ് ജാമിസണ്‍ നേടിയത്.ബോള്‍ട്ട്, വാഗ്നര്‍ എന്നിവര്‍ രണ്ട് വീതം വിക്കറ്റും നേടി.
മറുപടി ബാറ്റിങില്‍ ഒടുവില്‍ വിവരം ലഭിക്കുമ്പോള്‍ ന്യൂസിലന്റ് വിക്കറ്റൊന്നും നഷ്ടപ്പെടാതെ 24 റണ്‍സെടുത്തിട്ടുണ്ട്. ടോം ലഥാം (13), ഡെവണ്‍ കോണ്‍വെ (10) എന്നിവരാണ് ക്രീസിലുള്ളത്.